Sansar News
२०मसिंर बुजुम्बुरा । बुरुण्डीमा आएको पहिरोमा परी कम्तीमा ३८ जनाको मृत्यु भएको छ ।
स्थानीय अधिकारीहरूले बिहीबार दिएको जानकारीअनुसार देशको उत्तरपश्चिमी क्षेत्रमा पर्ने सिबीटोक प्रान्तमा पहिरोका कारण ती मानिसको मृत्यु भएको हो । अत्यधिक वर्षापछि बुधबार ठूलो पहिरो आएको स्थानीयले जनाएका छन् ।
पहिरोका कारण तीन ठाउँमा मृत्यु भएकाहरूको जोडेर ३८ पुगेको सार्वजनिक सुरक्षा मन्त्रालयका प्रवक्ता पिरे कुरिकियले पत्रकार सम्मेलनमा बताए ।
उनका अनुसार न्युम्पुँदुबाट २२, गिकोमेरोबाट तीन र रुकोम्बेबाट १३ मृत शरीरलाई पहिरोबाट झिकिएको छ ।
बिहीबार दिउँसो ४ बजेतिर आएको अत्यधिक वर्षा र पहिरोका कारण थप केही घरहरूमा क्षति पुगेको अधिकारीहरूले जनाएका छन् ।
कुरिकियेले मृत्यु हुनेको सङ्ख्या अझ बढ्न सक्ने बताउँदै घटनाबारे अनुसन्धान भइरहेको जानकारी दिए ।
वि.सं.२०७६ मंसिर २० शुक्रवार ०९:४९ मा प्रकाशित
