हामी सबैकाे संसारन्यूज

२८ मंसिर, धनुषा । धनुषाको छिरेश्वरनाथ नगरपालिका ५ महेन्द्रनगर बजार नजिकै भएको बम विष्फोटमा प्रहरी इन्सपेक्टर सहित तीनजनाको मृत्यु भएको छ ।

शुक्रबार राति स्थानीय राजेश शाहको घर नजिक बम रहेको खबर पाउनासाथ धनुषा प्रहरी कार्यालयबाट प्रहरी इन्सपेक्टर अमिर कुमार दाहालको टोली त्यहाँ पुगेको थियो । तर, बम हेर्दाहेर्दै विस्फोट हुँदा घाईते भएका सातजना मध्ये तीनजनाको उपचारका क्रममा मृत्यु भएको हो । ‘इन्सपेक्टर दाहालको टोली बम राखेको खबर आएपछि त्यहाँ जानु भएको थियो, त्यहाँ पुगेर बम हेर्दाहेर्दै विस्फोट भयो, केही गर्नै पाएनौं ।’ धनुषा प्रहरी कार्यालयका इन्सपेक्टर अवदेश यादवले संसारन्युजलाई भने ।

मृत्यु हुनेमा ४५ वर्षीय राजेश शाह, उनका छोरा २४ वर्षीय आनन्द शाह र प्रहरी इन्सपेक्टर ४२ वर्षीय अमिर कुमार दाहाल (संखुवासभा) को मृत्यु भएको इन्सपेक्टर यादवले बताए । उनका अनुसार राजेश यादव र आनन्द शाहको साविक जनकपुर अन्चल अस्पताल (हालको प्रादेशिक अस्पताल) मा उपचारका क्रममा मृत्यु भएको र प्रहरी इन्सपेक्टर दाहालको धरानको घोपा अस्पतालमा उपचारका क्रममा आज बिहान ७ बजे मृत्यु भएको हो ।

घोपा अस्पतालमा प्रहरी जवान रिजनाथ महतो, राजशेकै छोरी अन्जली साह र प्रकाश साहको गम्भीर अवस्थामा उपचार भइरहेको पनि इन्सपेक्टर यादवले बताएका छन् । अन्य घाईते सामान्य उपचार गरेर घर फर्किएको पनि उनले बताए ।

उनका अनुसार डिएसपी रामेश्वर कार्कीको टोली घटनास्थलमा पुगेर अनुसन्धान गरिरहेको र अहिले सम्म बम कस्ले राख्यो भन्ने कुरा बाहिर आइनसकेको पनि उनले बताएका छन् ।