Sansar News
४ माघ, काठमाण्डौं । श्रीमती र दुईछोरा सहित त्रिशुलीमा हाम फालेका विनयले त्रिशुलीमा हाम फाल्नुको कारण प्रहरीसमक्ष बताएका छन् ।
मकवानपुर चित्लाङ घरभई २० वर्षदेखि थानकोटमा बस्दै आएका ३५ वर्षीय विनय लामिछानेले प्रहरीका सामु आफू अनलाइन बिजनेसका कारण साहुको सावा व्याज समेत तिर्न नसकेर त्रिशुलीमा हाम फालेको बताएका छन् ।
शिक्षण पेशा छोडेर अनलाइन विजनेशमा लागेका उनी त्यसबाट घाटा भएको र ऋण थेग्न नसकेपछि त्यस्तो गलत बाटो अपनाएको शनिबारको अन्नपूर्णपोष्ट दैनिकमा समाचार छ ।
धादिङको बेनिघाट रोराङ गाउँपालिका ४ बाँदरे घुम्टीनजिकै विनय र उनकी पत्नी जमुनाले एक÷एक छोरा च्यापेर विहिबार त्रिशुलीमा हाम फालेका थिए । त्यसलगत्तै स्थानीय रिर्सोट र होटल सञ्चालकले विनयलाई जिवितै उद्धार गरे पनि जमुना मृत अवस्थामा भेटिएकी छन् । साथै ६ र २२ महिने दुई छोरा नदीमा बेपत्ता भएका छन् । प्रहरीले शुक्रबार बिहानदेखि ती बालकहरुलाई खोजेपनि वर्षाभइरहेको कारण खोजीमा कठिनाई भएको इलाका प्रहरी गजुरीले जनाएको छ ।
लामिछाने दम्पत्तिको सानो छोराको पास्नी शुक्रबारका लागि तय भएको थियो । घरमा सुतक परेको र उत्तम साइत शुक्रबार भएकाले जमुनाको माइतीबाट पास्नी गर्ने तयारीका साथ उनीहरु विहिबार धादिङ हिँडेका थिए । तर, आदमघाट झर्नुपर्नेमा पौने घण्टाको दूरीमा रहेको बेनिघाटस्थित बाँदरे घुम्तीमा पुगेका थिए । ‘उनीहरु यहाँ आदमघाट नझरी सिधै उता पुगेछन्’ जमुनाका दाइ जगत रेग्मीले भने, ‘भान्जाको भात खुवाइको तयारीमा उनीहरुलाई पर्खिरहेका थियौं । अचानक दुःखद खबर सुन्नुपर्यो ।’
नदी किनारमा छोरालाई भातु खुवाइमा लगाइदिनका लागि लगिएको चाँदीको बाला समेत भेटिएको थियो । उनीहरुले आत्महत्याको तयारीका साथ घर छाडेको जिल्ला प्रहरी कार्यालय धादिङका प्रमुख रविन्द्र रेग्मीले बताएका छन् । नउीहरुको थानकोटस्थित घरको सिरानीमुनी सु–साइड नोट समेत प्रहरीले फेला पारेको छ । त्यसमा व्यवसाय गर्दा थुप्रै ऋण लागेको र ऋणको सावा व्याज तिर्न नसकेकर आत्महत्याको बाटो रोजेको उनीहरुले लेखेको पनि प्रहरीले जनाएको छ ।
वि.सं.२०७६ माघ ४ शनिवार ०९:२२ मा प्रकाशित
