हामी सबैकाे संसारन्यूज

२ फागुन, काठमाडौं । सञ्चार तथा सूचना प्रविधिमन्त्री गोकुल बाँस्कोटाले विद्युतीय कारोबार ऐनभन्दा सूचना प्रविधि विधेयक धेरै लचक भएको बताएका छन् । डिजिटल क्षेत्रलाई वैधता दिन सूचना प्रविधि विधेयक ल्याइएको उनको भनाई थियो ।

क्यान इन्फोटक २०२०को उद्घाटन कार्यक्रमलाई सम्बोधन गर्दै बाँस्कोटाले डिजिटल क्षेत्रको पारदर्शिता, सुशासन र यसको वैधताका लागि विधेयक ल्याइएको बताए । विधेक पारित नभए डिजिटल कारोबारले वैधता नपाउने समेत उनले बताए ।

विधेयकमा दण्ड जरिबाना बढी भए पनि त्यसलाई अझै मिलाउन सकिने अवस्था भएको उल्लेख गर्दै बाँस्कोटाले भन्नुभयो, ‘एउटा स्याल चल्ला टिप्ने हुन्छ । उसले चिल आयो, चिल आयो भनेर कराउँछ । त्यसपछि मान्छे आकाशतिर हेर्छ । स्यालले चल्ला टिप्छ । अभिव्यक्ति स्वतन्त्रता भनेर कराउने तर डिजिटल क्षेत्रमा पारदर्शिता र सुशासन आएको नहेर्ने ?’

मन्त्री बाँस्कोटाले सामाजिक सञ्जालमा कसैलाई निरन्तर गलत नियत राखेर जिस्क्याउनेलाई कारबाही हुने भन्ने शब्दको अन्य अर्थ लगाएर ब्याख्या भइरहेको बताए।

शुक्रबारबाट क्यान इन्फोटक मेला २०२० सुरु भएको छ । कम्प्युटर एशोसिएशन नेपाल क्यान महासंघको आयोजनामा फागुन ७ गतेसम्म चल्ने सूचनाप्रविधि सम्बन्धी प्रदर्शनीमा १ सय ८५ भन्दा बढी स्टलहरु रहेका छन् ।