हामी सबैकाे संसारन्यूज

१७ फागुन, काठमाण्डौं । विश्व स्वास्थ्य संगठन (डब्लूएचओ) ले नेपाल सहित पाँच देश कोरोनाको उच्च जोखिमममा रहेको चेतावनी दिएको छ । जेनेभास्थित मुख्यालयमा विहिबार पत्रकार सम्मेलन गर्दै डब्लूएचओका प्रमुख डा. टेडरोस गेब्रिएसुसले नेपाल, भारत, पाकिस्तान, श्रीलंका र अफगानिस्तान कोरोनाको उच्च जोखिममा रहेको बताएका हुन् ।

कोरोनाले विश्वव्यापी महामारीको रुप लिँदै गएकाले ढुक्क नबस्न उनले सबै मुलुकलाई अपिल गरेका छन् । ‘कुनै देशले कोरोना भित्रदैँन भनेर बसे गम्भीर गल्ती हुन्छ,’ उनले भने, ‘सबै देशले मौसमलाई ध्यान दिँदै आइसोलेसन युनिट, औषधि र अन्य स्वास्थ्य उपकरणको उचित प्रबन्ध गर्नू ।’

स्वास्थ्य तथा जनसंख्या मन्त्रालयका प्रमुख विशेषज्ञ डा. दीपेन्द्र रमण सिंहले नेपालमा डब्लूएचओले कोरोनाको उच्च जोखिम औल्याएके बताए । नेपालले अहिलेसम्म कोरोना नियन्त्रणका लागि कुनै अर्थपूर्ण तयारी गर्न सकेको छैन ।

डब्लूएचओको अनुसार पछिल्लो २४ घण्टामा सात देशले रिर्पोट पेस गरेकोमा चीनमा भन्दा द्रुत गतिमा संक्रमण देखिएको छ । ब्राजिल, जर्जिया, ग्रिस, उत्तर म्यासेडोनिया, नर्वे, पाकिस्तान र रोमानियाले पहिलोपटक केस रिर्पोट गरेका हुन् ।

८ डिसेम्बरको चीनको वुहानमा देखिएको कोरोना विश्वका ५० देशमा फैलिइसकेको छ । कोभिड –१९ बाट ८३ हजारभन्दा बढीसंक्रमित छन् भने २८ सय ५१ को ज्यान गएको पनि शनिबारको नयाँपत्रिका दैनिकमा समाचार छ ।