हामी सबैकाे संसारन्यूज

१८ फागुन, काठमाडौं । कोरोना भाइरसको सङ्क्रमण रोक्न नेपाल सरकारले पूर्व तयारीका लागि उच्च सतर्कता अपनाउने भएको छ । विश्व स्वास्थ्य संगठनले नेपाल उच्च जोखिममा रहेको तथ्याङ्क प्रस्तुत गरेसँगै सरकारले कोरोना भाइरसको संक्रमण रोकथामको पूर्व तयारी र त्यसका लागि उच्च सतर्कता अपनाउने निर्णय गरेको हो ।

चीनबाट शुरु भएको कोरोनाको संक्रमण विश्वका ६४ भन्दा धेरै देशमा फैलिएको र विश्व स्वास्थ्य संगठन (डब्लूएचओ) ले समेत नेपाललाई उच्च जोखिममा राखेको बेला प्रधानमन्त्री केपी शर्मा ओलीले शनिबार साँझ बालुटारमा मन्त्रीहरूको बैठक बोलाएर उच्च सतर्कता अपनाउने निर्णय गराएका थिए ।

पूर्व तयारीका क्रममा नेपालले पनि केही मुलुकबाट आउने उडानहरू रोक्ने तयारी गरेको छ। ‍आइतबार दिउँसो सिंहदरबारमा अधिकारीहरूले चीन, कोरियालगायत मुलुकबाट हुने उडान रोक्नेबारे छलफल गरिरहेको जनाइएको छ।

मुख्यसचिव लोकदर्शन रेग्मीले यसबारे सम्बद्ध निकायका अधिकारीहरूसँग समन्वय गरिरहेको बताएका छन् । सरकारले केही समयका लागि अन्तर्राष्ट्रिय पाहुनाहरू सहभागी हुने सभा सम्मेलन पनि रोक्ने तयारी गरिरहेको रेग्मीले जानकारी दिए ।