हामी सबैकाे संसारन्यूज

२९ मङ्सिर,बागलुङ  । नेपाली काँग्रेसका केन्द्रीय सदस्य शेखर कोइरालाले पुरानै संरचनामा स्थानीय तहको निर्वाचन गर्नुपर्ने बताउनुभएको छ ।

नेका क्षेत्र नं १ बागलुङमा आयोजित कार्यकर्ता प्रशिक्षण कार्यक्रमलाई आज सम्बोधन गर्दै उहाँले भन्नुभयो, “‘पुरानै संरचनामा भएपनि स्थानीय तहको निर्वाचन गर्नुपर्छ ।’

नयाँ संरचनामा जाँदा ढिलो हुने अवस्था रहेकाले यसअघिकै गाविस र नगरपालिकाको निर्वाचन गर्नुपर्ने उहाँको भनाइ छ । उहाँले २०७४ माघ ७ गतेभित्र तीनै तहको निर्वाचन सम्पन्न गर्नुपर्ने उल्लेख गर्नुभयो ।

नेता कोइरालाले निर्वाचनसँगै संविधान पनि कार्यान्वयनमा जाने बताउनुभयो । “समयमै निर्वाचन नहुने हो भने संविधान खतरामा पर्ने अवस्था आउन सक्छ,” उहाँले भन्नुभयो – “निर्वाचनले मुलुकलाई सही दिशा निर्दिष्ट गर्छ, मुलुकको हित नचाहने तत्वको पनि पराजय हुन्छ ।”

उहाँले मधेसको समस्यालाई कम आँक्न गर्न नमिल्ने बताउँदै मधेसी, थारु, जनजातिलगायतका समस्यालाई राष्ट्रिय तहमा समाधान गर्नुपर्ने बताउनुभयो । केही दलले मधेसीको राष्ट्रियताप्रति अनावश्यक आशङ्का गरेको उहाँको भनाइ थियो । उहाँले राज्यका विभिन्न निकायमा अराजकता मौलाएकाले त्यसलाई तुरुन्त अन्त गर्नुपर्ने धारणा पनि राख्नुभयो ।

नेता कोइरालाले काँग्रेस पार्टीभित्र मौलाएको गुट–उपगुटप्रति पनि असन्तुष्टि पोख्दै त्यसले समस्या निम्त्याएको बताउनुभयो । प्रशिक्षण कार्यक्रम बिहीबारसम्म चल्नेछ । रासस