हामी सबैकाे संसारन्यूज

काठमाडौँ । अभिनेत्री श्वेता खड्काद्वारा क्यान्सर हस्पिटलको निर्माण हुने भएको छ । यहि सोमबार गोदावरीको छप्पीमा हस्पिटलको भवन निर्माणको शिलान्यास गरिएको हो ।

अभिनेत्री श्वेता खड्काका श्रीमान् तथा नायक श्री कृष्ण श्रेष्ठको पनि क्यान्सरकै कारण मृत्यु भएको थियो । विवाह भएको एक महिना नपुग्दै उनले आफ्नो श्रीमान गुमाएकी थिइन् । त्यस्तै, श्वेताका भिनाजुको पनि क्यान्सरकै कारण मृत्यु भएको थियो । जीवनका प्यारा मान्छे क्यान्सरले गर्दा गुमाएका कारण उनले क्यान्सर हस्पिटलको निर्माण कार्यमा हात हालेकी हुन् ।

चलचित्र क्षेत्रमा भन्दापनि सामाजिक कार्यमा निकै व्यस्त रहेकी श्वेताले उपचार नपाएर कसैले संसार छोड्नु नपरोस र आफूले जस्तो पिडा अरुलाई नपरोस भन्ने सोच बनाएर क्यान्सर हस्पिटलको निर्माणमा जुटेकी हुन् । उनले नेशनल क्यान्सर अस्पतालबाट प्रभावित भएर यस काममा हात हालेको बताएकी छन् ।

अभिनेत्री श्वेताका अनुसार सय सय्या क्षमता भएको यस हस्पिटलको नाम नेशनल हस्पिटल एण्ड क्यान्सर रिशर्च सेन्टर राखिएको छ । यस हस्पिटलले क्यान्सर रोगको उपचार गर्नुका साथै क्यान्सरको बारेमा जनचेतना जगाउने काम पनि गर्नेछ । उनी क्यान्सरको लागी काम गरिरहेका केही टिमसँग सहकार्य गरेर यसको लागी, अगाडि बढेकी हुन् ।