हामी सबैकाे संसारन्यूज

३० मंसिर, भक्तपुर । भक्तपुर अन्तर्राष्ट्रिय व्यापार मेला–२०१६ का अवसरमा आयोजित उपत्यकाव्यापी बाँसुरी बाजा प्रतियोगितामा नगदेशको झ्वापुननी बाँसुरी बाजा खलः प्रथम भएको छ । प्रथम भएसँगै उक्त खलःले रु २५ हजार नगद पुरस्कारसमेत हात पारेको छ ।

प्रतियोगितामा नगदेशकै नेवाः ऐतिहासिक सांस्कृतिक भजन खलः दोस्रो स्थान हात पार्न सफल भएको छ भने तेस्रो स्थान भक्तपुर बचत तथा ऋण सहकारी संस्था लि भएको छ । प्रतियोगितामा दोस्रो र तेस्रो भएको समूहले क्रमशः रु १५ हजार र रु १० हजार नगद पुरस्कार प्राप्त गरेका छन् ।

प्रतियोगितामा भक्तपुरको श्री कविलास बाँसुरी बाजा खलः र पासा पुचः समूह सान्त्वना पुरस्कार पाउन सफल भएको प्रतियोगिता संयोजक एवम् उद्योग वाणिज्य सङ्घ कला संस्कृति प्रवद्र्धन समिति भक्तपुरका सभापति गणेशहरि प्रजापतिले जानकारी दिनुभयो । मेलामा गत आइतबार बाँसुरी बाजा प्रतियोगिता भएको थियो । उपत्यकाका विभिन्न आठ वटा समूहले सहभागिता जनाएको सो प्रतियोगिताको नतिजा बुधबार मेला समापनका अवसरमा सार्वजनिक गर्दै पुरस्कृत गरिएको हो ।