हामी सबैकाे संसारन्यूज

कैलालीको धनगढी उपमहानगपालिकाले कोरोनाको जोखिमबाट बच्च भन्दै आफ्नो उपमहानगरका विद्यालयहरू बन्द गर्ने निर्णय गरेको छ । विश्वका विभिन्न देशमा कोरोना भाइरस फैलिँदै गइरहेको भन्दै त्यसबाट जोगिनका लागि उपमहानगपालिकाले विद्यालय बन्द गर्ने निर्णय गरेको हो ।

शुक्रबार एक प्रेस विज्ञप्ति जारी गर्दै नगर क्षेत्रका सबै माध्यमिक तहसम्मका शैक्षिक संस्थाहरू बन्द निर्णय उपमहानगरपालिकाले गरेको हो । उपमहानगरपालिकाको निर्णय अनुसार आइतबारदेखि लागू हुने गरी शैक्षिक संस्था बन्द गर्न निर्देशन जारी गरिएको छ।

‘यस उपमहानगरपालिकाअन्तर्गत सञ्चालित सामुदायिक तथा संस्थागत विद्यालयहरू लगायत सम्पूर्ण शिक्षण संस्थाहरूमा आधारभूत तथा विद्यालयका आन्तरिक परीक्षालगायत पठनपाठनका सम्पूर्ण क्रियाकलापहरू अर्को सूचना नभएसम्म आइतबारदेखि लागू हुने गरी बन्द गर्ने निर्णय गरिएको व्यहोरा सम्पूर्ण शिक्षक, विद्यार्थी, अभिभावक र आम नगरबासीमा जानकारी गराइन्छ’ नगरप्रमुख नृपबहादुर वडद्वारा हस्ताक्षरित विज्ञप्तिमा भनिएको छ ।

कोरोना भाइरस संक्रमण फैलिन सक्ने भन्दै सरकारले चैत ५ गतेभित्र वार्षिक परीक्षा सक्न निर्देशन दिएको थियो। तर, उपमहानगरपालिकाले त्योभन्दा अगावै विद्यालय बन्द गर्ने निर्णय गरेपछि वार्षिक परीक्षा अनिश्चित हुने भएको छ ।