Sansar News
११ चैत्र, काठमाडौँ । महामारीका रुपमा फैलिएको कोरोना नियन्त्रणका लागि नेकपाले ५ सदस्यीय न्युक्लियस गठन गरेको जनाएको छ ।
कोरोना नियन्त्रण तथा रोकथामका लागि पार्टी नेता तथा कार्यकर्ता परिचालन गर्ने भन्दै नेपाल कम्युनिस्ट पार्टी (नेकपा) क्षेत्र नम्बर १ काठमाडौले सो न्युक्लियस गठन गरेको हो ।
राज्यका निकाय तथा स्वास्थ्यकर्मीलाई सहयोग गर्न भनि गठन गरिएको ५ सदस्यीय सो न्युक्लियसको संयोजकमा नेकपा नेता अनिल शर्मा रहेका छन् भने सदस्यहरुमा विदुर मैनाली, कल्पना राणा, ईश्वर सापकोटा र गणेश दुलाल रहेका छन् ।
नेता अनिल शर्माका अनुसार १ नम्बर निर्वाचन क्षेत्रका पार्टी जिल्ला सदस्य तथा जनवर्गीय संगठनलाई समेत समेटेर ११ वटा टोलहरुमा स्वयसेवक समिति गठन गरीएको छ । नेपाल सरकार एवम् विश्व स्वास्थ्य संगठन लगायतका आधिकारिक निकायबाट जारी जानकारीहरुको प्रभावकारी कार्यान्वयन गराउन तथा जनतालाई भाइरसका विरुद्ध लड्न तयार गर्ने लगायतका काम यी समितिहरुलाई तोकिएको छ ।
वर्तमान असाधारण परिस्थितिमा पनि यस्तो रचनात्मक कामको प्रयास गर्ने अनिल शर्मा र संलग्न नेतृत्वपंक्तिले बिधिसम्मत निर्णय गरेको भन्दै कार्यकर्ताहरुले कार्यक्षेत्रमा जुटने बताएका छन् ।
वि.सं.२०७६ चैत ११ मंगलवार २०:५२ मा प्रकाशित
