हामी सबैकाे संसारन्यूज

१२ चैत, काठमाण्डौं । भरतपुरको कोरोना विशेष अस्पतालमा मंगलबार मृत्युभएका युवाको स्वाव परीक्षणमा कोरोना नेगेटिभ देखिएको छ ।

चैत ९ गते कोरोना भाइरस संक्रमणको आशंकमा उक्त अस्पतालमा भर्ना भएका ती युवाको स्वाव परीक्षणका लागि टेकुमा पठाइएको थियो ।

ती युवामा संक्रमण नदेखिएको अस्पतालाका प्रमुख डाक्टर भोजराज अधिकारीले संसारन्युजलाई जानकारी दिएका छन् । अधिकारीका अनुसार राष्ट्रिय जनस्वास्थ्य प्रयोगशाला टेकुकी निर्देशक डा.रुना झाले यसबारेमा टेलिफोन गरेर कोरोना नेगेटिभ भएको जानकारी दिएकी हुन् ।

पहिलेदेखि मिर्गौलाका विरामी रहेका वीरगन्ज २२ जगन्नाथपुरका ३० वर्षीय सन्तोष यादवको मंगलबार बिहान उपचारका क्रममा मृत्यु भएको थियो ।

लुपस नामक रोगबाट पीडित रहेका उनमा ज्वरो र निमोनिया देखिएपछि चितवन मेडिकल कलेजले कोरोना विशेष अस्पतालमा रिफर गरेको थियो ।

कोरोना संक्रमणको आशंकामा टेकु अस्पतालमा हालसम्म ५ सय ८७ जनाको नमुना परीक्षण गरिएको छ । ती मध्ये चीन, फ्रान्स र खाडीबाट आएका तीन जनामा कोरोना संक्रमण पोजेटिभ देखिएको हो । तीमध्ये एक जना निको भइसकेका छन् ।