हामी सबैकाे संसारन्यूज

१६ चैत्र । कोरोना भाइरसका बिरामीसँग नजिक भएर काम गर्ने चिकित्सक तथा नर्सहरु यतिबेला भगवान जस्तै बनेका छन् । उनीहरुको सेवाबाट बिरामी सन्चो भएर फर्किरहेका छन् । संक्रमितको उपचार गर्न पठाउनु पर्दा परिवारहरु डराइरहेका छन् । आँखै अगाडि मृत्यु देख्दा देख्दै पनि ज्यानै जोखिममा राखेर काम गरिरहेका उनीहरुको हौसला अत्यन्त जरुरी छ ।

यस्तै हौसला बढाउने काम गरेका छन् भारतीय प्रधानमन्त्री नरेन्द्र मोदीले । उनले पूणेको एक नर्स छाया जगतापसँग शुक्रबार फोनमा कुराकानी गरेका छन् । प्रधानमन्त्री मोदी र नर्स छायाबीचको कुराकानीको भिडियो सामाजिक सञ्जालमा भाइरल बनेको छ । यसले कोरोना भाइरस संक्रमितको सेवामा जुटिरहेका चिकित्सक तथा नर्सहरुलाई हौसला मिलेको छ ।

पूणे नगर निगमअन्तर्गतको नायडु अस्पतालमा काम गर्ने ती नर्ससँग प्रधानमन्त्री मोदीले फोनमा कुराकानी गरेका हुन् । फोनमा मोदीले ‘तिमी संक्रमितको समर्पणका साथ हेरचाह गरिरहेकी छौँ, यस्तो अवस्थामा तपाईको सुरक्षा बारे परिवारको डर भगाउन कसरी सक्छौँ’ भनेर सोधेका थिए ।

जवाफमा छायाले भनेकी थिइन् ‘म आफ्नो परिवारको बारे चिन्तित छु, तर यस अवस्थामा मैले बिरामीको सेवा गर्नुपर्दछ । म ती बिरामीको सेवामा जुटिरहेको छ ।’

प्रधानमन्त्रीले नर्ससँग भने ‘तपाईजस्तै सेवामा जुट्ने लाखौँ नर्स, मेडिकल कर्मचारी तथा डाक्टर साँचो अर्थमा जीवनदाता हुन् जो हाल देशका विभिन्न अस्पतालमा बिरामीको सेवा गरिरहेका छन् । म तपाईलाई बधाइ दिन चाहन्छु । म तपाईको अनुभव सुनेर निकै खुशी भएँ ।’

प्रधानमन्त्रीले अस्पतालमा भर्ना भएका बिरामी कत्तिको डराएका छन् भन्ने जिज्ञासासमेत राखेका थिए । जवाफमा छायाले भनिन् ‘हामी बिरामीसँग कुराकानी गरेर नडराउन भनिरहेका छौँ । बिरामीको सम्झाउँछौँ की तपाईलाई केही हुँदैन, तपाईहरुको परीक्षण नेगेटिभ आउने छ । जुन व्यक्तिको परीक्षण पोजेटिभ आएको छ, हामी उनीहरुको हौसला बढाउँछौँ ।’ उनले अस्पतालबाट ७ जना उपचारपछि घर फर्किएको पनि जानकारी गराएकी थिइन् ।

छायाले कुराकानीमा ‘तपाई जस्तो प्रधानमन्त्री पाउनु हाम्रो देशको लागि सौभाग्य हो, भन्दै उनले संक्रमितको सेवामा जुटेका सम्पूर्ण स्वास्थ्यकर्मीलाई सन्देश सुनाइन् । उनले भनिन् ‘हामी डराउन जरुरत छैन, यो रोगलाई भगाएर देशलाई जिताउनु छ । अस्पतालका कर्मचारीले पनि नडराइ सेवा दिनु पर्दछ ।’ म सिर्फ आफ्नो काम गरिरहेको छु, तर अहिले २४ घण्टा देशको सेवा गरिरहेको छु, हामी तपाईप्रति आभारी छौँ, तपाई जस्तो प्रधानमन्त्री हुनु देशको लागि सौभाग्य हो ।’