हामी सबैकाे संसारन्यूज

३० चैत्र, काठमाडौँ। गैरआवासीय नेपाली संघ (एनआरएनए) ले २४ सै घन्टा सञ्चालन हुने टेलिफोन हेल्पलाइन सुरु गरेको छ । कोरोना भाइरस संक्रमणबाट विभिन्न मुलुकमा रहेका गैरआवासीय नेपालीहरुले सामना गरिरहेका समस्या सुनवाई गर्न सो सेवा सञ्चालनमा ल्याइएको एनआरएनए अध्यक्ष तथा कोबिड–१९ उच्चस्तरीय समितिका संयोजक कुमार पन्तले जानकारी दिए ।

सो सेवाको सूरुवात गैरआवासीय नेपाली संघको काठमाडौंस्थित सचिवालयबाट आजैदेखि सुरु गरिएको छ। कोरोना महामारीले विश्वमा भइरहेको लकडाउका कारणले विदेशमा अलपत्र परेका, बैदेशिक रोजगारी रहेका नेपालीलगायतले आ–आफ्ना समस्या सो हटलाइनमा फोन गरेर टिपाउन सक्ने छन् । भाइबर, ह्वाट्सएपबाट पनि हेल्पलाइनमा सम्पर्क गर्न सकिने बताइएको छ ।

सम्पर्क नम्बर-
‌बिहान ६ देखि दिउँसो २ बजेसम्म: +९७७-९८४१-२८०००५
दिउँसो २ बजेदेखि राती १० बजे सम्म: +९७७-९८०८-३१२५५५
राती १० बजेदेखि बिहान ६ बजेसम्म: +९७७-९८२३४५८२०४ (नेपाल समय)

आफ्ना समस्या फेसबुक (www.facebook.com/NRNAOfficial) वा ईमेल ([email protected]) बाट पनि राख्न सकिनेछ।

यसअघि एनआरएनएले विश्वभर छरिएका नेपाली समुदायले स्वास्थ्यसम्वन्धी समस्याको सुनुवाई गर्न डा. सञ्जीव सापकोटाका संयोजकत्वमा २४ सैं घन्टा स्वास्थ्य हेल्प लाइन सञ्चालनमा ल्याएको थियो ।