हामी सबैकाे संसारन्यूज

२ बैशाख, काठमाण्डौं । सरकारले लकडाउन थप्ने तयारी गरेको छ ।  त्यसका लागि प्रधानमन्त्री निवास बालुवाटारमा मन्त्रिपरिषद्को बैठक बसिरहेको छ । सरकारले तेश्रोपटक थप गरेको लकडाउनको समयाबधि भोली (बुधबार) सकिने हुनाले लकडाउन पुनः थप गर्ने तथा अन्य छलफलका लागि बैठक बसेको हो । श्रोतका अनुसार लकडाउन पुनः एकसाताका लागि थपिने तयारी भएको छ ।

लकडाउन घोषणा गरेको तीन हप्तामा सरकारले आवतजावतमा रोक, अस्पतालहरुको तयारी, तथा संक्रमण रोकथामका लागि संघ, प्रदेश र स्थानीयस्तरमा तिब्र रुपमा परीक्षण बढाएर संक्रमण फैलिन नदिनका लागि काम गरिरहेको छ ।

सरकारले हालसम्म भरपर्दो रुपमा लिइएको पिसीआर प्रविधिबाट ५ हजार ६ सय बढी नमुना परीक्षण गरेको बताएको छ । यसैबीचमा सरकारले पिसिआर प्रविधिसहितका प्रयोगशाला समेत निर्माण समेत गरेको बताएको छ ।

नेपालमा सोमबार थपिएका कैलालीकी एक महिला र रौतहटका एक पुरुष सहित कोरोना संक्रमितको संख्या १४ पुगेको छ । त्यस्तै पेप्सीकोलास्थित सनसिटी अर्पाटमेन्टमा पनि एकैपरिवारको तीनजनामा कोरोना संक्रमण भएको आशंका गरिएको छ । उनीहरुको पाटनस्थित अस्पतालमा आइसोलेसनमा उपचार भइरहेको बताइएको छ ।