हामी सबैकाे संसारन्यूज

६ बैशाख, काठमाण्डौं । नेपालका ७७ वटै जिल्लामा (र्यापिड डाइग्नोस्टिक टेष्ट) सुरु भइसकेको स्वास्थ्य तथा जनसंख्या मन्त्रालयले जनाएको छ । यसबीचमा अहिलेसम्म १९ हजार ४५४ जनामा र्यापिड टेष्ट गरिएको छ । (पछिल्लो २४ घण्टामा २ हजार ८८९ जनाको परीक्षण गरिएको हो) जसमा केही पोजेटिभ देखिएपनि उनीहरुको पिसीआर प्रविधिबाट जाँच भइरहेको पनि जानकारी दिइएको छ ।

त्यस्तै हालसम्म आइसोलेसनमा सम्भावित र संक्रमीत गरेर १ सय १७ जना रहेका छन् । उनीहरुमध्ये उपत्यकामा ५ जना र उपत्यका बाहिर १ सय १२ जनाको विभिन्न अस्पतालमा उपचार भइरहेको छ । रेडजोनमा २ सय ५४ जना रहेका छन् भने क्वारेन्टाइनमा ४ हजार ५३६ जना रहेका छन् ।

त्यस्तै हालसम्म ३० जना संक्रमितमा २ जना निको भइसकेको र अन्य २८ जनाको विभिन्न अस्पतालमा उपचार भइरहेको छ ।

जसमा टेकुमा १, पाटनमा २, बाग्लुङमा २, धनगढीमा ५, वीरगन्जमा ४, भरतपुरमा २ र विराटनगरमा १२ जनाको उपचार भइरहेको । उनीहरु सबैको स्वास्थ्य स्थिति सामान्य रहेको पनि स्वास्थ्य मन्त्रालयले जानकारी दिएको छ ।

त्यसैगरी लकडाउनका कारण बालबालिका तथा किशोर किशोरीहरुले समस्या भोगिरहेको अवस्थामा अभिभावकले उनीहरुका लागि सहज वातावरण बनाइदिन मन्त्रालयले अनुरोध गरेको छ ।

उनीहरुलाई घरमै रमाइलो वातावरणको निर्माण, घरभित्रै खेल्न सकिने खेलको व्यस्थापन, शारीरिक तथा बौद्धिक क्षमताको विकासमा ध्यानदिनुपर्ने तथा टिवीमा डरलाग्दा कुरा हेर्न नदिने, घरायसी क्रियकलापमा संलग्न गराउने लगायतका सहज वातावरण निर्माण गरिदिन पनि अनुरोध गरिएको छ ।