हामी सबैकाे संसारन्यूज

२१ बैशाख, रोल्पा । क्वारेन्टाइनमा बसाइपछि त्रिवेणी गाउँपालिका ७ गैरीगाउँ मैतेगातिनाका लाल बहादुर खत्री बिहीबार घर पुगे ।

६ महिनापछि उनी परिवारसँग खुसी साट्न चाहान्थे । तर, विहीबारै बेवारिसे बम विस्फोटमा दुई छोराछोरी गुमाउनुपरेपछि उनका आँखाबाट आँसु खसिरहेको छ । उनकी पत्नीको पनि हालत उस्तै छ । काखमा दुई वर्षकी दूधे छोरी आमाको आँसु पिइरहेकी छन् ।

‘क्वारेन्टाइनमा १० दिन बसेर दिउँसो ४ बजे घर आएँ । छोराछोरी थिएनन् । गोठालो गएका रैछन,’ लालबहादुरले गहभरी आँसु छचल्काउँदै भने,‘साँझ ६ बजे विस्फोटको आवाज सुनियो । हेर्न जाँदा छोराछोरीलाई क्षतिविक्षत अवस्थामा देखेँ ।’

घटनास्थल नजिकै थप विस्फोटक पर्दाथ देखिएपछि उनले छोराछोरीको शब समेत सुम्सुम्याउन पाएनन् । ६ महिना अघि मजदुरीमा गएका उनको परिवारसँग खुसी साट्ने आँसुमा बदलियो । लकडाउनका कारण काठमाण्डौंमा ईट्टाभट्टामा अलपत्र परेका उनलाई उर्जामन्त्री वर्षमान पुनको टोलीले घर आउन सघाएको थियो । गाउँमा उनी ह्याङ विद्यालयमा १० दिन क्वारेन्टाइनमा बसेका थिए । आइतबारको अन्नपूर्णपोस्ट दैनिकबाट