हामी सबैकाे संसारन्यूज

२४ वैशाख, काठमाडौँ । प्रधानमन्त्री तथा नेपाल कम्युनिष्ट पार्टी(नेकपा)का अध्यक्ष केपी शर्मा ओली र कार्यकारी अध्यक्ष पुष्पकमल दाहाल ‘प्रचण्ड’ बीच स्थायी समितिको बैठक बोलाउने सहमति भएको छ ।

नेकपाको आज साँझ आयोजित सचिवालय बैठकपछि दुई नेताको छलफलबाट सो सहमति गरिएको बताइएको छ । प्रधानमन्त्री ओली निकट सुत्रका अनुसार विवाद र मतान्तर रहेपनि बैठक गर्ने कुरामा २ नेता बीच सहमति भएको हो । तर सो सुत्रले स्थायी समितिको बैठक कहिले गर्ने बारेमा खुलाएन ।

२० जना स्थायी समिति सदस्यले प्रधानमन्त्री ओलिको नियत र कार्यशैलीको आलोचना गर्दै आएका बेला वैशाख २० गते भएको सचिवालय बैठकले २५ गतेका लागि स्थायी समितिको बैठक तोकेको थियो र सो बैठकको कार्यसूचि(एजेण्डा) सहित प्रतिवेदनका लागिकार्यकारी अध्यक्ष प्रचण्ड र महासचिव विष्णु पौडेललाई जिम्मेवारी दिइएको बताइएको थियो ।

यस बिचमा बैठक लगत्तै ओलिले आफू निकटसँग कुराकानी बढाएको, प्रचण्ड–माधब पक्षले बैठक र भेला गर्न सुरु गरेको, भैंसेपाटी पछि हात्तिवन बैठक गरेको, वामदेव समेत खुमलटार पुगेको जस्ता विषय संचारमाध्यममा आएका थिए ।

नेकपाको एक स्रोतले २४ गते साँझको सचिवालय बैठकमा माधव नेपालले ओलीलाई पार्टी पद्दतिमा चल्नु पर्छ भनेर भनेको र अधिकांश सदस्यले समर्थन गर्दा ओलि रिसाएर बैठकबाट बाहिरिएको भनेपनि प्रधानमन्त्रीको कार्यव्यस्तताले प्रचण्डलाई बैठक चलाउन भनेको अर्को स्रोतले बताएको छ । सचिवालयको बैठक स्थगित भएपछि दुई अध्यक्षले स्थायी समितिको बैठक बोलाउने सहमति गरेपनि मिति र समय निर्धारण गर्न नसकेको भने स्विकार गरिएको छ ।