हामी सबैकाे संसारन्यूज

२४ बैशाख, कतार । नेपाली दूतावास कतारले कोरोना भाइरस (कोभिड १९) का कारण समस्यामा परेका ६०९ जना नेपालीलाई राहत वितरण गरेको बताएको छ ।

दूतावासले कतार च्यारिटीसँग समन्वय गरी उक्त सँस्थाको सहयोगमा समस्यामा परेका ६०९ जना नेपालीहरुलाई राहत खाद्यसामग्री वितरण गरिएको बताएको छ ।

दूतावासका अनुसार उक्त राहत सामग्री गैह्रआवासीय नेपाली संघ कतार मार्फत ३३० प्याकेट र राजदूतावासले प्रत्यक्ष रुपमा २७९ प्याकेट वितरण गरिएको हो । उक्त राहत खाद्यसामग्री प्याकेटमा एक जनालाई दुई हप्ताको लागि पुग्ने खाद्यान्न रहेको जानकारी समेत दूतावासले दिएको छ ।

दूतावासले कोभिड १९ बाट प्रभावित नेपालीहरुले दूतावासमा गरेका विभिन्न प्रकारका गुनासाहरुको समाधानका लागि रोजगारदाता कम्पनी, कतारका सरकारी तथा अन्य सम्बन्धीत निकाय एनआरएनए तथा समुदायसँग निरन्तर समन्वय र सहजीकरण गरिरहेको पनि जानकारी दिएको छ ।

दूतावासको अनुरोध

हालको असहज परिस्थितिमा आफूलाई परेका समस्याको जानकारी तथा गुनासाहरु राख्न अथवा आफ्ना चासो धारणा वा जिज्ञासा राख्न अन्य माध्यमका अतिरिक्त दूतावासले प्रयोगमा ल्याएको नयाँ WhatsApp नम्बर +974 33560117 मा Text वा Voice Message पठाउन सकिने व्यहोरा अनुरोध छ ।

यसका साथै कतारमा रहेका नेपालीहरुको अवस्था र समस्याहरुको अभिलेखीकरण गरी त्यसको विश्लेषणबाट दीर्घकालीन रुपमा समस्याहरुको समाधानका लागि आवश्यक समन्वय तथा सहजीकरण गर्ने प्रयासस्वरुप दूतावासले प्रयोगमा ल्याएको गुगल फर्म https://forms.gle/2pqn6fJ5aTCFex1b6 मा आफ्नो विवरण भरी सहयोग गरिदिनुहुन समेत सबैमा पुन अनुरोध छ ।