हामी सबैकाे संसारन्यूज

१ जेठ, काठमाण्डौं । राष्ट्रिय आविस्कार केन्द्रका प्रमुख डा.महाविर पुनले किड्नी डाइलासिस गर्ने संस्था तथा अस्पतालहरुका मशीन बिग्रिएको भए निःशुल्क मर्मत गरिदिने बताएका छन् ।

पुनले कोरोना महामारीका कारण मशीन बिग्रिएर डाइलोसिस गर्ने काम रोकिएको छ भने त्यस्ता संस्थाहरुको मशीन निःशुल्क बनाइदिने जानकारी दिएका छन् । उनले त्यस्ता मशीनहरु आविस्कार केन्द्रले निःशुल्क बनाइदिने भन्दै त्यसका लागि ९८४१५९२३६१ मा फोन गर्न अनुरोध गरेका छन् ।

राष्ट्रिय आविष्कार केन्द्रका ई. जोसेफ श्रेष्ठको अगुवाईमा नेपाल बायोमेडिकल ईन्जिनियर एसोसिएसनको स्वयंसेवक बायोमेडिकल ईन्जिनियरहरुको सहयोगमा मिर्गौला डाईलेसिस गर्ने बिग्रेका मशीनहरु निःशुल्कमा मर्मत गर्न सहयोग गर्ने पनि पुनले जानकारी दिएका छन् ।

डा. पुनले आविस्कार केन्द्रले अहिलेसम्म नेपाल आर्मी अस्पतालको १२ वटा डाईलेसिस मशीनहरु मर्मत गर्न सफल भएको बताउँदै ति मशीनहरु मर्मत गर्नको लागि चाहिने सानातिना पार्टपुर्जाहरु आविस्कार केन्द्रले नै व्यवस्थापन गरेको जानकारी दिएका छन् ।

‘त्यसको साथै अहिलेसम्म राष्ट्रिय आविष्कार केन्द्रको टीमले बिभिन्न अस्पतालको ४० वटा भेन्टिलेटरहरु पनि मर्मत गर्न सफल भएका छन् ।’ डा. पुनले भनेका छन् ।