हामी सबैकाे संसारन्यूज

नेपाली कांग्रेसले उद्योगपति बिनोद चौधरीको अध्यक्षतामा लगानी, पूर्वाधार र रोजगार : दृष्टिकोण एवं दिगो परियोजना सम्बन्धी अध्ययनका लागि बिशेष समिति गठन गरेको छ ।

विश्वयापी कोरोनाको महामारी र त्यसले नेपालको अर्थतन्त्रमा पारेको प्रभाव अध्ययन गर्नका लागि नेपाली कांग्रेसको शुक्रबार बसेको केन्द्रीय समितिको बैठकले उद्योगपति चौधरीको अध्यक्षतमा विशेष समिति गठन गरेको हो ।

कोरोनाका कारण देशको विभिन्न क्षेत्रमा परेको असर अध्ययन गरि देशका लागि आवश्यक कार्य गर्न विभिन्न समिति गठन गर्ने निर्णय गरे बमोजिम पार्टीका सभापति शेरबहादुर देउवाले ‘लगानी, पूर्वाधार र रोजगार: दृष्टिकोण एवं दिगो परियोजना बिशेष समिति’ गठन गरेका हुन् ।

जसको सदस्यहरुमा दिपक खड्का, उमेश श्रेष्ठ, ईन्द्र बानियाँ, टेकबहादुर गुरुङ, कर्मा घले, जिप छिरिङ लामा, छत्र गिरि, सूर्यबहादुर के.सी, मोहन आचार्य, तेजुलाल चौधरी, अनिल रुङ्गटा, बिष्णुबहादुर खड्का, पूर्णबहादुर तामाङ र खगेश्वर बोहरा रहेका छन् ।

समितिले तत्काल कोरोनाका कारण नेपालको लगानी, पूर्वाधार र रोजगारको क्षेत्रमा परेको असरलाई तत्कालीन र दूरगामी रूपमा सम्बोधन गर्न सकिने नीति बारे आवश्यक अध्ययन पश्चात् पार्टीको ‘अर्थतन्त्र केन्द्रीत बिशेष समिति’ लाई सुझाव दिने बताइएको छ । त्यस्तै दीर्घकालीन रूपमा लगानी, पूर्वाधार र रोजगारको क्षेत्रमा दूरगामी दृष्टिकोण साथ दिगो परियोजनाहरुको परिकल्पना र कार्यान्वयनमा भूमिका निर्वाह गर्ने र समितिको संख्या २१ मा नबढ्ने गरि थप गरिने जानकारी समेत दिइएको छ ।