Sansar News
६ जेठ,काठमाण्डौं । रोल्पा जिल्ला अस्पतालमा एक युवाको आइसोलेसनमै राखेर उपचार गर्ने क्रममा मृत्यु भएको छ ।
आइतबार राति १० बजे काठमाण्डौंबाट रोल्पा पुगेका उनलाई स्थानीयको आग्रहमा जिल्ला अस्पतालमा स्वास्थ्य जाँचका लागि पठाइएको थियो ।
‘काठमाण्डौंबाट आइतबार राति १० बजे उहाँ आउनु भएको थियो । बाहिरबाट आएको भनेर स्थानीयको आग्रहमा उहाँलाई जिल्ला अस्पतालमा चेकजाँचको लागि पठाइएको थियो,’ रोल्पा नगरपालिकाका प्रमुख पूर्ण केसीले संसारन्युजलाई भने, ‘त्यहाँ कोरोना संक्रमण भए\नभएको र्यापिड टेष्ट गरिएको थियो । त्यो नेगेटिभ आएको थियो । दुवै मिर्गाैलाका बिरामी उहाँको सोमबार दिउँसो ४ बजे जिल्ला अस्पतालकै आइसीयुमा मृत्यु भएको हो ।’
२२ वर्षीय ती युवाको सोमबारै पिसीआर प्रविधिबाट श्वाब संकलन गरेर राप्ति बिज्ञान स्वास्थ्य प्रतिष्ठानमा पठाइएको र नमुनाको रिर्पोट आउन बाँकी रहेको नगरप्रमुख केसीले जानकारी दिए ।
लामो समयदेखि दुवै मिर्गौला खराब भएका ती युवा लकडाउन अघिनै मिर्गौला डाइलोसिसमा सहज हुने भन्दै काठमाण्डौं आएका थिए । उनी आइतबार मात्रै रोल्पा फर्किएका हुन् ।
नेपाली सेना तथा प्रहरीको टोलीले उनको शव व्यवस्थापनमा लागेको पनि उनले जानकारी दिए ।
उनमा कोरोना संक्रमण भएको/नभएको रिर्पोट आएपछि मात्र थाहा हुने नगरप्रमुख केसीले बताए ।
वि.सं.२०७७ जेठ ६ मंगलवार ०९:२६ मा प्रकाशित
