हामी सबैकाे संसारन्यूज

१८ जेठ, काठमाण्डौं । गुल्मीको एक क्वारेन्टाइनमा रहेका ५६ वर्षीय व्यक्तिले आत्महत्या गरेको समाचार छ ।

दिल्लीबाट फर्किएका छत्रकोट गाउँपालिका वडा नं ४ का ५६ वर्षीय चन्द्र बहादुर परियारले क्वारेन्टाइनमा आएको केही समयमै आत्महत्या गरेका हुन् ।

दिल्लीबाट फर्किएका उनलाई शनिबारै सुनौली नाकाबाट उद्धार गरेर गुल्मी लगिएको थियो । छत्रकोटको आर्दश माविमा रहेको क्वारेन्टाइनमा राखिएका उनी क्वारेन्टाइभन्दा २०० मिटर पर रहेको रुखमा झुण्डिएको अवस्थामा फेला परेका थिए ।

‘बेलुका उहाँहरु आउनु भयो । क्वारेन्टाइनमा बस्दा पिशाब लाग्यो भनेर जानु भएको रहेछ । बेलुकाको खाना खाने बेलासम्म नआएपछि खोज्न जाँदा उहाँ झुण्डिएको अवस्थामा फेला पर्नु भएको थियो’, गाउँपालिकाकी उपाध्यक्ष नर्मदा भण्डारीले संसारन्युजसँग भनिन् ‘काँधमा गम्छा रहेको र सोहि गम्छालाई च्यातेर आधा–आधा पारेर झुण्डिनु भएको रहेछ ।’

यहि कारणले आत्महत्या गरेको भनेर पुष्टि भएको छैन । प्रहरी आएर मुचुल्का उठाएको छ । के कारण भनेर पछि पत्ता लाग्ने उपाध्यक्ष भण्डारीले बताइन् ।

‘यस्तो गर्न नहुने हो । देशमा कोरोनाको महामारी बढ्दै गइरहेको अवस्थामा देशैभरी क्वारेन्टाइनको व्यवस्था गरेर उहाँहरुको स्वास्थ्य, सुरक्षा र उहाँहरुकै परिवारको स्वास्थ्यका लागि पनि क्वारेन्टाइनमा राखिएको हो । गाउँपालिकाले सबै सुविधा उपलब्ध गराएर उहाँहरुकै लागि काम गरिरहेको छ । हतोत्साहि नभई १४ दिन क्वारेन्टाइनमा बसिदिन अनुरोध गर्दछु ।’ उपाध्यक्ष भण्डारीले भनिन् ।
उपाध्यक्ष भण्डारीले पालिकाको सबै वडामा गरेर हालसम्म झण्डै २०० जनालाई क्वारेन्टाइनमा राखिएको बताइन् ।