हामी सबैकाे संसारन्यूज

२५ जेठ, काठमाण्डौ । डोटीमा क्वारेन्टिनमा रहेका एक युवाको मृत्यु भएको छ ।

डोटीको के.आई. सिंह गाउँपालिका वडा नं ३ दल्लस्थित सिताराम आधारभूत स्कुलमा रहेको क्वारेन्टिनमा रहेका युवाको आइतबार बिहान २ बजे मृत्यु भएको हो ।

दिल्लीबाट ७ दिन अघि आएर सोहि क्वारेन्टिनमा रहेका उनको आइतबार बिहान मृत्यु भएको गाउँपालिकाकी उपाध्यक्ष मिना विष्टले संसारन्युजलाई जानकारी दिएकी छन् ।

‘पहिलेदेखि निमोनिया हुने र मुटुको समस्या थियो । दिल्लीबाट आएको ७ दिन भयो । राम्रै बसेका थिए । खाना पनि राम्रै खान्थे हिजो त डेग लगाएर गीत सुनेर रमाइलो पनि गरेका थिए राति त्यस्तो भयो ।’

उपाध्यक्ष विष्टले क्वारेन्टिनमा रहँदा उनमा त्यस्तो केही स्वास्थ्य समस्या नदेखिएको पनि बताइन् ।

क्वारेन्टिनस्थलमै रहेकी उपाध्यक्ष विष्टले मृतकमा कोरोना संक्रमण भए\नभएको भन्ने परीक्षणका लागि श्वाव संकलनका लागि प्रहरी सहितको स्वास्थ्यकर्मीको टोली आइसेकेको पनि जानकारी दिएकी छन् ।

उपाध्यक्षका अनुसार महिला तथा बालबालिका गरेर उक्त क्वारेन्टिनमा हाल ९ जना रहेका छन् ।

के.आई.सिंह गाउँपालिकामा रहेका विभिन्न स्कुलहरुमा बनाईएको २७ वटा क्वारेन्टिनमा झण्डै १४ सय जनालाई राखिएको पनि उपाध्यक्षले जानकारी दिइन् ।