हामी सबैकाे संसारन्यूज

काठमाडौं । दोस्रो ‘नाइमा मोबिलिटी एक्स्पो‘ मंगलबार राजधानीमा भव्य उद्घाटन भएको छ । राजधानीको भृकुटीमण्डपमा ६ दिनसम्म चल्ने प्रदर्शनीको उद्घाटन प्रमुख अथिती प्रहरी महानिरिक्षक दानबहादुर कार्कीले दिप प्रज्वलन गरेर गरे ।

उद्घाटन समारोहको समापनसँगै पञ्चेवाजासहित संयुक्त रुपमा रिवन काटेर प्रदर्शनीको सुरुवात गरिएको थियो । उद्घाटन समारोहमा एक दर्जनभन्दा बढी दुई पाङ्ग्रे, चार पाङ्ग्रे तथा व्यवसायीक सवारीका साधनहरुको सार्बजनिक गरिएको छ ।

काठमाडौंको भृकुटीमण्डपमा सुरु भएको प्रदर्शनीमा पनि उत्साह देखिएको छ । प्रदर्शनीमा विद्युतीय सवारीहरुको बर्चस्व देखिएको छ । प्रदर्शनी यहि साउन ३१ गतेसम्म सन्चालन हुने आयोजकले जनाएको छ ।
प्रदर्शनी विद्युतिय सवारीमय बन्दैगर्दा पेट्रोलियम पदार्थबाट सञ्चालन हुने सवारीहरुको व्यवसाय भने संकटमा पर्ने देखिएको छ । यद्यपी, नेपालमा पहिलोपटक एसेम्बल गरिएको आधुनिक मोडलको सवारी हुण्डाईको नयाँ मोडल भने सार्वजनिक गरियो । जसलाई हेर्ने दर्शकहरुको संख्या उल्लेख्य थियो ।

अर्कोतर्फ नेपालमा विद्युतिय गाडी आयात गर्ने दुई वटा ठूला कम्पनी टाटा मोटर्स र विवाइडीले आफ्ना नयाँ मोडलका विद्युतिय गाडीहरु सार्वजनिक गरे । जसको सार्वजनिकरण नाइमाकी अध्यक्ष ऋतुसिंह वैद्यले गरिन् ।
टाटा भने नाइमा मोविलिटि एक्सोमा पहिलोपटक सहभागी भएको हो भने विवाइडी नाइमाको संस्थापक सदस्य हो ।