हामी सबैकाे संसारन्यूज

५ असार, डडेल्धुरा । कोरोना परीक्षणको रिर्पोट नआउँदै घर पठाईएका ५८ जनामा कोरोना संक्रमण भएको पुष्टि भएको छ ।
डडेल्धुरा गन्यपधुरा गाउँपालिकाले क्वारेन्टिनबाट घर पठाएकामध्ये ५८ जनामा कोरोना पोजेटिभ देखिएको हो ।

गाउँपालिकाले कोरोना परीक्षणका लागि क्वारेन्टिनमा रहेका व्यक्तिको स्वाव संकलन गरी एक साता अघि घर पठाएको थियो । कोरोना परीक्षणको रिर्पोट नआउँदै घर पठाइएका सोहि गाउँपालिकाका ५८ जनाको रिर्पोट विहिबार पोजेटिभ आएपछि गाउँपालिकाभरी नै सन्त्रास फैलिएको शुक्रबारको राजधानी दैनिकमा समाचार छ ।

क्वारेन्टिनमा राखिएको १४ दिनसम्म कसैमा पनि कोरोनाको लक्षण नदेखिएको र स्वाब परीक्षणको रिर्पोट ढिला भएकाले क्वारेन्टिनबाट घर पठाइएको गन्यापधुरा स्वास्थ्य शाखा प्रमुख वाशुदेव न्यौपानेले बताएका छन् । उनले भने, ‘रिर्पोट आउन ढिला भयो कुनै व्यक्तिमा पनि लक्षण देखिएको थिएन त्यसैले हामीले घर पठाएका हौ ।’
डडेल्धुरामा बिहिबार मात्रै ८३ जनामा कोरोना संक्रमण भएको पुष्टि भएको छ ।