हामी सबैकाे संसारन्यूज

कैलाली । कैलालीको मोहन्याल गाउँपालिका–७ स्थित पितमारी खोलामा आएको बाढीले मोटरसाइकलसहित बगाएका एक चालकको प्रहरीले सकुशल उद्धार गरेको छ।

अविरल वर्षासँगै पितमारी खोलामा आएको बाढीले सुर्खेतबाट कैलालीतर्फ आउँदै गरेका कैलालीको बर्दगोरिया गाउँपालिका–२ निवासी ३९ वर्षीय लौटन थारु सवार से ४ प ८६७९ नम्बरको मोटरसाइकल बगाएको थियो।

घटना बिहीबार राति करिब ८ः३० बजे भएको हो। मोटरसाइकलसहित खोलाले बगाइरहेको सूचना पाएपछि इलाका प्रहरी कार्यालय चिसापानी, कैलालीबाट प्रहरी निरीक्षक मीरा खड्काको कमाण्डमा प्रहरी टोली घटनास्थल पुगेको थियो।

प्रहरी टोलीले खोलाले बगाउँदै लगेका थारुलाई घटनास्थलबाट करिब १५० मिटर तल भिरालो खोलाबाट तत्काल उद्धार गरेको प्रहरीले जनाएको छ।

उद्धार गरिएका थारुको ढाड र दाहिने कुहिनामा सामान्य चोटपटक लागेको छ। उनको समग्र स्वास्थ्य अवस्था भने सामान्य रहेको प्रहरीले जनाएको छ।

उद्धारपछि थारुलाई आवश्यक अवस्थाबारे बुझेर आफन्तको जिम्मा लगाइएको छ। बाढीका कारण बगाइएको मोटरसाइकलको अवस्थाबारे भने प्रहरीले आवश्यक खोजी तथा व्यवस्थापन गरिरहेको जनाएको छ।