हामी सबैकाे संसारन्यूज

२३ असार, काठमाडौँ । समाजवादी पार्टीकी नेतृ सरिता गिरीलाई पार्टीले पार्टीको साधारण सदस्यसमेत नरहने गरी सांसद पदबाट हटाएको छ ।

समाजवादी पार्टीको आज बसेको पदाधिकारी बैठकले उक्त निर्णय गरेको बताइएको छ । रामसहायप्रसाद यादवको नेतत्वको कार्यदलले सांसद गिरीलाई कार्वाही गर्न सिफारिस गरेअनुसार आजको पदाधिकारी बैठकले सो निर्णय लिएको समाजवादी पार्टीका नेता विश्वदिप पाण्डेले बताए ।

गिरीको गतिविधिबारे छानबिन गर्न समाजवादी पार्टीले महासचिव रामसहायप्रसाद यादवको नेतत्वमा तीन सदस्यीय कार्यदल बनाएको थियो ।

उनलाई नक्सासम्बन्धी संविधान संशोधन प्रस्तावको विरुद्धमा उभिएर पार्टीको ह्विप उल्लंघन गरेका कारण कार्वाही स्वरुप समाजवादी पार्टीले सो निर्णय लिएको हो । उनले पार्टीको निर्णय विपरीत संसदमा विधेयक प्रस्तुत गरेकी थिइन् । पार्टीले त्यो फिर्ता लिन र संविधानको अनुसूची संशोधनको पक्षमा मतदान गर्न ह्वीप जारी गरेको थियो ।

गिरीलाई पार्टीको साधारण सदस्यसमेत नरहने गरी हटाइएको जानकारी सांसदलाई गराइने पनि नेता पाण्डेले बताए ।

संविधानको धारा ८९ को (ङ) मा जुन दलको उम्मेदवार भई प्रतिनिधिसभा सदस्य बनेको हो, त्यो दलले दल त्याग गरेको कुरा जानकारी दिएमा सांसद पद स्वतः निलम्वन हुने प्रावधान छ ।