Sansar News
१० साउन, काठमाण्डौं । नेपालमा शनिबार (१० साउन) सम्म पिसीआर प्रविधिबाट ३ लाख ३९ हजार १५७ वटा कोरोना भाइरसको नमुना परीक्षण गरिएको छ ।
जसमा पछिल्लो २४ घण्टामा पिसीआर प्रविधिबाट ४,०७५ वटा नमुना परीक्षण गरिएको स्वास्थ्य तथा जनसंख्या मन्त्रालयका प्रवक्ता जागेश्वर गौतमले शनिबार आयोजित नियमित पत्रकार सम्मेलनमा जानकारी दिएका छन् ।
त्यसैगरी हालसम्म देशका विभिन्न अस्पताल तथा आइसोलेशन सेन्टरहरुमा ५,४३० जनाको उपचार भइरहेको छ । साथै हालसम्म भारत लगायत विभिन्न देश र एक जिल्लाबाट अर्को जिल्लामा पुगेर क्वारेन्टिनमा बस्नेहरुको संख्या १८ हजार १८३ रहेको छ । यो संख्या दिनप्रतिदिन घटिरहेको छ ।
आज थपिएका १०९ जनासँगै नेपालमा हालसम्म संक्रमितको संख्या १८ हजार ४८३ पुगेको छ भने आज निको भएर १०६ जना डिस्चार्ज भएसँगै नेपालमा हालसम्म १३ हजार ५३ जना कोरोना संक्रमणबाट मुक्त भएका छन् । साथै आजपनि एक युवतीको मृत्यु भएसँगै हालसम्म नेपालमा कोरोना संक्रमणबाट मृत्यु हुनेको संख्या ४५ पुगेको छ ।
नेपालमा आज १०९ जनामा कोरोना संक्रमण
नेपालमा आज १०९ जनामा कोरोना संक्रमण्ढा पुष्टि भएको छ । स्वास्थ्य मन्त्रालयका अनुसार पछिल्लो २४ घण्टामा गरिएको कोरोनाको नमुना परीक्षणमा १०९ जनामा संक्रमण पुष्टि भएका हो । देशभरीका रहेका प्रयोगशालामा गरिएको ४,०७५ वटा नमुना परीक्षणमा १०९ जना संक्रमित भेटिएका हुन् ।
मन्त्रालयका अनुसार आज सबैभन्दा बढी डोटीमा १३ जा, सुर्खेतमा ११, सप्तरीमा ११ जनामा संक्रमण देखिएको छ ।
त्यसैगरी पर्सामा ८, कपिलवस्तुमा ६, जाजरकोटमा ६ दाङमा ५, पाल्पामा ४, नवलपुरमा ४, रौतहटमा ४, र डडेलधुरामा ४ जनामा संक्रमण पुष्टि भएको छ ।
त्यस्तै बारामा ३, बैतडीमा ३, दैलेखमा ३, गुल्मी ३ र कालिकोटमा ३ जना र मुगु, अछाम, काठमाडौं, बाँके, बर्दियामा २/२ जना तथा ललितपुर, अछाम, तनहुँ, चितवन, मकवानपुर, झापा, खोटाङ, सर्लाही र हुम्लामा १/१ जना रहेका छन् ।
मन्त्रालयका अनुसार हालसम्म ७७ जिल्लामध्ये ६ जिल्ला कोरोना संक्रमणबाट मुक्त भएका छन् । ती जिल्लामा पाँचथर, भोजपुर, संखुवासभा, मनाङ र मुस्ताङ, रसुवा रहेका छन् । साथै ५०० भन्दा बढी संक्रमित उपचार रहेका जिल्लामा रौतहट, कैलाली र बाजुरा रहेका छन् ।
आज १०६ जनाले कोरोना जितेर घर फर्किए
नेपालमा आज १०६ जनाले कोरोना भाइरस (कोभिड–१९) बाट मुक्त भएर डिस्चार्ज भएका छन् । आज निको भएका १०६ जनासँगै नेपालमा साउन १० सम्म कोरोना संक्रमणबाट मुक्त हुनेको संख्या १३ हजार ५३ पुगेको छ । यो संख्या ७०.६ प्रतिशत रहेको स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार हालसम्म सातै प्रदेशमा निको हुनेको संख्या यस प्रकार रहेको छ ।
जसमा प्रदेश १ मा ७७५ जना, प्रदेश २ मा २,८९८ जना, बाग्मति प्रदेशमा ४६८ जना, गण्डकी प्रदेशमा १,१२५ जना, प्रदेश नं ५ मा ३,९०० जना, कर्णाली प्रदेशमा १,५८५ र सुदूरपश्चिम प्रदेशमा २,३०२ गरी आजसम्म निको हुनेको संख्या १३ हजार ५३ पुगेको छ ।
क्वारेन्टिनमा रहनेको विवरण
प्रदेश १ मा २,२०९, प्रदेश २ मा २,३०२, बाग्मति प्रदेशमा १,३८४, गण्डकी प्रदेशमा ३,२१६, प्रदेश नं ५ मा २७७९ कर्णाली प्रदेशमा १०१७ र सुदूरपश्चिम प्रदेशमा ५२७६ जना गरी सातै प्रदेशका क्वारेन्टिनमा रहनेको संख्या १८ हजार १८३ रहेको छ । यो संख्या दिनप्रतिदिन घट्दै गइरहेको छ ।
कोरोना संक्रमणबाट आज पनि एक युवतीको मृत्यु
नेपालमा कोरोना संक्रमणबाट आज पनि एक युवतीको मृत्यु भएको छ ।
स्वास्थ्य तथा जनसंख्या मन्त्रालयका अनुसार वाराको परवानीपुर गाउँपालिका वडा नं ८ की १७ वर्षीया युवतीको कोरोना संक्रमणबाट शुक्रबार मृत्यु भएको हो ।
साउन ९ गते बेलुका गण्डक कोभिड अस्पताल वीरगन्जमा उपचारका क्रममा उनको मृत्यु भएको हो ।
बुधबार वीरगन्ज हेल्थ केयर अस्पतालमा उपचारका लागि गएकी ती युवतीको आरडिटी परीक्षणमा पोजेटिभ देखिएपछि विहिबार अस्थायी कोभिड अस्पतालमा थप उपचारका लागि रेफर गरिएको थियो । साउन ८ गते श्वाव संकलग गरी गरिएको पिसीआर परीक्षणमा ९ गते कोरोना पुष्टि भएको थियो ।
उनको शरीरमा अक्सिजनको मात्रा कम हुनुका साथै पखाला लाग्ने, शरीर काप्ने र श्वास प्रस्वासमा समेत समस्या आएको मन्त्रालयले जानकारी दिएको छ ।
ती युवतीको मृत्युभएसँगै नेपालमा कोरोना संक्रमणबाट मृत्यु हुनेको संख्या ४५ पुगेको छ ।
वि.सं.२०७७ साउन १० शनिवार १८:१९ मा प्रकाशित
