हामी सबैकाे संसारन्यूज

११ साउन, काठमाडौँ । १० साउन २०७५ मा कन्चनपुरको भिमदत्त २ उल्टाखामकी १३ वर्षीया निर्मला पन्तको बलात्कारपछि हत्या भयो । त्यसको भोलिपल्ट भीमदत्त १८ निम्बुखेडास्थित उखुबारीमा उनको शब फेला पर्यो । तर, प्रहरीको एकपछि अर्को गल्तीले रुमल्लिएको यो हत्या प्रकरणका अभियुक्त अझै फेला परेका छैनन् । बरु थप अनुसन्धान ठप्प बनेको छ ।

हत्या प्रकरणको अनुसन्धानमा खटिएका आठप्रहरीविरुद्ध नै प्रमाण नष्ट गरेको तथा आरोपितलाई यातना दिएको अभियोगमा दायर मुद्दा कन्चनपुर जिल्ला अदालतमा विचाराधीन छ । मुद्दाको फैसला आएपछि मात्र अनुसन्धानलाई गति दिने प्रहरीको तयारी छ । यस्तै अनुसन्धान निचोड नै बाझिएकाले पनि मुख्य आरोपि दिलीपसिंह विष्टलाई पक्राउ गर्न प्रहरीले आँट गर्न सकेको छैन ।

मुख्य आरोपि सिंह नै बलात्कारपछि हत्यामा संलग्न रहेको निलम्बित डिएसपी अंगुर जिसीले दाबी रगेका छन् । उनले हत्या घटनाको आफ्नो अनुसन्धानमा आफू अडिग रहेको बताउँदै उक्त घटनामा दिलीप बाहेक अरुको संलग्नता हुनै नसक्ने बताएका छन् ।

उनले आंकलनको भरमा नभई धेरै कोणबाट अनुसन्धान गरेर मात्र आफूले यस्तो दाबी गरेको बताएको पनि आइतबारको नयाँपत्रिका दैनिकमा समाचार छ ।

उनले नेपाल प्रहरीमा आफूभन्दा बिज्ञ अनुसन्धान अधिकृतहरु रहेको बताउँदै भनेका छन्, ‘मैले हचुवाका भरमा कसैलाई खडा गरेको भए उहाँहरुले पत्ता लगाउनुहुन्थ्यो । तर, दुई वर्ष वित्यो दिलीपबाहेक अहिलेसम्म कोही भेटिएका छैनन् । पछिल्लो अनुसन्धानले पनि दिलीपलाई दोषी देखाएको छ । निर्मलाकी आमाले पनि उसैविरुद्ध किटानी जाहेरी दिनु भएको छ । एआइजी धीर बस्नेतको नेतृत्वको टोलीको रिर्पोट गलत भएको आइसकेको छ । डिएनए रिर्पोट नै गलत भएको बिज्ञ समितिबाट प्रमाणित भइसकेको छ । अर्थात्, हाम्रो अनुसन्धान नै सहि थियो भन्ने धेरैजना पुगेका छन् ।, तर हिम्मत गरेका छैनन् ।’