हामी सबैकाे संसारन्यूज

११ साउन, काठमाडौँ । सरकारले लकडाउन खोलेको केही दिनमै वीरगन्जमा निषेधाज्ञा लगाउनुमा मुख्यकारक लापरवाही देखिएको छ । भारतको बिहारसँग खुला सीमा जोडिएको र बिहारमा संक्रमितको संख्या तीब्र गतिमा बढिरहेका कारण पनि वीरगन्ज अझ उच्च जोखिममा परेको हो ।

‘दुवै देशका नाका सिल छ तर लकडाउन खुकुलो भएसँगै लुकिछिपी मान्छेहरु वीरगन्ज छिर्न सुरु गरिसकेका थिए,’ सामाजिक अभियन्ता ओमप्रकाश सर्राफले भने, ‘नाकामा खटिएका सुरक्षाकमीले ५/५ सय रुपैयाँ लिएर मान्छेलाई उताबाट यता छिराएका छन् । यही लापरवाहीले आज वीरगन्जको यो अवस्था आएको हो ।’ उनका अनुसार वीरगन्जमा कैयन पसले रक्सौलका निवासी हुन् । उनीहरु बिहान रक्सौलबाट आएर पसल खोल्थे, साझ फर्किन्थे ।

नाकामा कुनै किसीमको रोकटोक थिएन । बिहिबार राति वीरगन्जमा संक्रमण पुष्टि भएका पाँच थुनुवा भारतीय नागरिक रहेको तथ्यले पनि सर्राफको तर्कलाई पुष्टि गर्छ । पर्साकी प्रहरी उपरीक्षाक गंगा पन्तले संक्रमण पुष्टि भएका पाँच थुनुवा भारतीय नागरिक रहेको बताइन् । उनीहरु लुकिछिपी वीरगन्ज छिरेको अवस्थामा प्रहरीले नियन्त्रणमा लिएको हो ।

वीरगन्ज उपमहानगरपालिकाका मेयर विजय कुमार सरावगीले भने स्थानीय प्रहरी प्रशासनको लापरवाहीका कारण वीरगन्जमा कोरोना समुदायस्तरमा फैलिएको आरोप लगाए । आइतबारको अन्नपूर्णपोष्ट दैनिकबाट