हामी सबैकाे संसारन्यूज

काठमाडौं । सत्तारुढ नेकपाका प्रवक्ता नारायणकाजी श्रेष्ठले सरकार र न्यायलयको कार्यसम्पादन असह्य हुने खालको भएको टिप्पणी गरेका छन् । सरकारले गरिब निमुखाप्रति अन्याय गरिरहेको र न्यायलयले पीडित माथि नै अन्याय गरिरहेको श्रेष्ठको टिप्पणी छ ।

उनले सरकार र न्यायलयको भूमिकाले जनतामा निकै असह्य र आक्रोशको अवस्था सिर्जना गराएको बताए । आइतबार सामाजिक सञ्जालमार्फत बोल्दै श्रेष्ठले भने, ‘‪के हुदैछ यस्तो ? न्यायालय र सिङ्गै राज्य प्रणाली र ब्यबस्थामाथि नै प्रश्न उठ्ने गरी न्यायालयद्वारा निर्णय किन गरिदैछ ? बास र छाक टार्ने समस्याबाट पिडीत गरीब चेपाङ युवाको हत्या सँवेदनशील सुरक्षा अङ्गबाट नै दर्दनाक ढङ्गले पिटी पिटी किन गरिन्छ र सुकुम्बासी झुप्रामा आगो किन लगाईन्छ ? कथित दलित भएकै आधारमा बर्बर सामुहिक हत्या किन गरिन्छ ? हद भयो ,असह्य भयो। न्याय स्थापित होस् र दोषी माथि कार्बाही होस् ।’

https://www.facebook.com/100007426923538/posts/2677547365836135/?d=n

प्रवक्ता श्रेष्ठले सरकार र न्यायलयको चरित्र नबदलीय त्यसले दुस्परीणाम दिने पनि चेतावनी दिए । लोकतान्त्रिक प्रणालीअनुरुपको राज्यको पुनसंरचना पनि आवश्यक रहेको श्रेष्ठको भनाई छ ।

‘यो अवाजलाई समयमै सम्बोधन गरौं र राज्यका अङ्गहरुको लोकतन्त्र अनुरुप पुनसंरचना गरी लोकतन्त्रलाई व्यवहारतः अभ्यास गरौं र विकास गरौं, अन्यथा निरासा, आक्रोस, अनिश्चय र तरलता को परिणाम के होला ? समयमै सबैले सोचौं, परिणाम सधैं सकारात्मक नै हुन्छ भन्न सकिन्न’, श्रेष्ठले भने ।

पछिल्लो साता रञ्जन कोइरालाको सन्दर्भमा गरिएको फैसलासँगै सर्वौच्च अदालत विवादमा तानिएको छ भने चेपाङ्ग बस्तीमा आगो लगाउने सरकारी निकायको गतिविधि र रुकुममा भएको नरसंहारप्रति सरकारको निकै आलोचना भएको छ । कुनै पनि घटनाबारेमा स्पष्टीकरण नदिँदा सरकार झनै विवादमा पर्दै गएको छ ।