हामी सबैकाे संसारन्यूज

काठमाडौं । सत्तारुढ नेकपाभित्र किचलो बढिरहेको बेला अध्यक्ष पुष्पकमल दाहाल ‘प्रचण्ड’ पक्षीय समुहको भेलाले विवाद समाधानको निकास बहुमतबाट खोज्ने निर्णय गरेको छ । दाहाल निवास खुमलटारमा सोमबार बिहान भएको भेलाले पार्टी विवाद समाधानको उपाय बहुमतबाट गर्ने निर्णय गरेको हो ।

भेलामा अध्यक्ष दाहालसहित वरिष्ठ नेता झलनाथ खनाल, माधवकुमार नेपाल, प्रवक्ता नारायणकाजी श्रेष्ठ र रामबहादुर थापा ‘बादल’सहितका केही स्थायी कमिटी नेताहरुको सहभागिता थियो । गत असार १० देखि जारी स्थायी कमिटी बैठक आन्तरिक विवादकै कारण अनिश्चित बन्दै गएको बेला भएको भेलाले बहुमतबाट निर्णय गर्ने गरि निष्कर्ष निकालेको हो ।

भेलाले मंगलबार बोलाईएको स्थायी कमिटी बैठक रोक्न नदिने पनि निष्कर्ष पनि निकालेको छ । जनाइएअनुसार खुमलटार भेलामा उपाध्यक्ष वामदेव गौतमको भने उपस्थिति थिएन ।

गत असार १० देखि सुरु स्थायी समिति बैठक आन्तरिक विवादका कारण असार १८ देखि लगातार स्थगित हुँदै आएको थियो । बैठक ८ पटकसम्म स्थगित भएको थियो । सहमतीका लागि भन्दै यसअघि असार २०, २२, २४, २६ र साउन २ र ४ मा स्थगित भएको थियो । गत असार ६ मा बसेको स्थायी समिति बैठक पनि एजेण्डामै प्रवेश नगरी स्थागित भएको थियो ।

स्थायी समिति बैठकका बीच बहुमत स्थायी समिति सदस्यले प्रधानमन्त्री एंव पार्टी अध्यक्ष ओलीको राजीनामा मागेसँगै नेकपाभित्र विवाद चुलिएको थियो । विवादकै कारण स्थायी समिति बैठक अवरुद्ध हुँदै आएको छ ।