हामी सबैकाे संसारन्यूज

१३ साउन काठमाडौँ । देशभर रहेका अधिकांश विश्वविद्यालयको खर्च प्रणाली मितव्ययी नभएको पाइएको छ ।

अधिकांश विश्वविद्यालयको आम्दानी भन्दा खर्च धेरै देखिएको छ । यसले विश्वविद्यालयको आर्थिक पारदर्शितामाथि पटक-पटक प्रश्न उठ्ने गरेको छ । देशकै जेठो त्रिभुवन विश्वविद्यालयले आम्दानीको तुलनामा खर्च एक चौथाइ बढी गरेको छ ।

विश्वविद्यालयअन्र्तगतका १३ निकायले तलब भत्तासमेतका शीर्षकमा स्वीकृत बजेटभन्दा १२ करोड २१ लाख ६ हजार रुपैयाँ बढी खर्च गरिको पाइएको मंगलबारको राजधानी दैनिकमा समाचार छ । त्रिभुवन विश्वविद्यालयअन्र्तगतका ६२ आगिंक क्याम्पस र अन्य निकायले आर्जन गरेको आन्तरिक आय २ अर्ब २३ करोड ३६ रुपैयाँ रहेको छ ।

यद्यपि खर्च ९ अर्ब ४१ करोड ९६ लाख रुपैयाँ भएको देखिएको छ । क्याम्पसहरुको खर्चमध्ये ७० प्रतिशतसम्म शिक्षक र कर्मचारीको तलब भत्तामा हुने गरेको छ ।
विद्यार्थी संख्या बर्सेनि घटेको, लामो अवधिदेखि शिक्षण शुल्क पुनरावलोकन नगरेको र आयस्रोतको व्यावस्थापनमा त्रिविले चासो नदेखाएको पाइएको छ ।
खर्च नियन्त्रण गरी आन्तरिक आयवृद्धि गर्न महालेखा परीक्षकको ५७ औं प्रतिवेदनले सुझाब दिएको छ । यस्तै, दाङको बेलझुन्डिमा रहेको नेपाल संकृत विश्वविद्यालयले विनियोजन गरिएको रकमभन्दा बढी खर्च गरेको पाइएको छ ।

विभिन्न खर्च र्शीर्षकमा स्वीकृत बजेट सिमा नघाइ १ करोड ६ लाख ९८ हजार रुपैयाँ खर्च गरेको महालेखकपरीक्षकको ५७ औं प्रतिवेदनमा उल्लेख छ ।
संस्कृत विश्वविद्यालयको आर्थिक प्रशासनसम्बन्धी नियमावली २०६७ को नियम २३ (३) मा सम्बन्धित शीर्षकमा स्वीकृत बजेटभन्दा बढी खर्च गर्न नपाउने व्यवस्था छ । संस्कृत विश्वविद्यालय संकृत शिक्षाको उत्थानमा केन्द्रत नभएको शिक्षाविद्हरु बताउछन् ।