हामी सबैकाे संसारन्यूज

१३ साउन, काठमाडौँ । कोरोना भाइरसको संक्रणबाट सोमबारसम्म नेपालमा ४८ जनाको मृत्यु भएको छ ।  उनीहरुमध्ये २७ जना दीर्घरोगी रहेको स्वास्थ्य तथा जनसंख्या मन्त्रालयले जनाएको छ ।

नेपालमा कोरोना भाइरसको संक्रमणबाट २ जेठमा सिन्धुपाल्चोककी सुत्केरीको धुलिखेल अस्पतालमा मृत्यु भएको थियो । मृत्युपछि स्वाब संकलन गरेर परीक्षण गर्दा ३ जेठमा कोरोना संक्रमण पुष्टि भएको थियो । त्यसयता ७२ दिनमा कोरोनाबाट ४८ जनाको मृत्यु भएको स्वास्थ्य मन्त्रालयले जनाएको छ ।

सोमबार साँझसम्म मृत्यु भएका ४८ जना कोरोना संक्रमितमध्य २२ जना ५० बर्षभन्दा माथिका छन् । त्यस्त,ै २६ जना ५० वर्षभन्दा कम उमेरका छन् । जसमा तीन बालबालिका पनि छन् । स्वास्थ्य मन्त्रालयको तथ्यांकअनुसार मृत्यु भएकामध्ये २७ जना गम्भीर प्रकारका दीर्घरोगी हुन् । उनीहरुमा मिर्गौलाको समस्या, क्यान्सर, क्षयरोग, मधुमेह, उच्च रक्तचापजस्ता समस्या रहेको पाइएको हो ।

मृत्यु भएकामध्ये सातजनामा श्वासप्रश्वासको समस्या देखिएको छ । त्यस्तै कोभिड-१९ बाट मात्रै चारजनाको मृत्यु भएको मन्त्रालयले जनाएको छ । मृत्यु भएका १० जनामा कोरोना पुष्टि भए पनि कारण खुलेको छैन् । स्वास्थ्य मन्त्रालयका अनुसार औसत प्रत्यक दुई दिनमा एकजनाको मृत्यु भएको छ । मृतक व्यक्त्तिमा कोरोना पुष्टि भएपछि उनीहरुको मृत्युको प्रमुख कारक कोरोना हो वा अरुनै त्यस बारे कुनै गहन अध्ययन नभएको मंगलबारको नयाँपत्रिका दैनिकमा समाचार छ ।

नेपालमा ४८ जनाको कोरोनाबाट मृत्यु भएको भनिएपनि प्रमुख कारण कोरोना नै हो भन्ने बिषयमा गम्भिर प्रश्न खडा भएको अनुसन्धान वैज्ञानिक डा. सन्तोष दुलालले बताए ।