हामी सबैकाे संसारन्यूज

काठमाडौं । सत्तारुढ नेकपाका नेता एवं बागमती प्रदेशका आन्तरिक मामिला तथा कानुन मन्त्री शालिकराम जम्कट्टेलले पूर्वमाओवादी नेताहरुको शैली गलत भएको भन्दै आक्रोश पोखेका छन् । उनले पार्टीको अन्तरसंघर्षमा पूर्वमाओवादी नेताहरुले नै पार्टी अध्यक्ष पुष्पकमल दाहाल ‘प्रचण्ड’लाई असहयोग गरेर कमजोर पार्न खोजेको आरोप लगाए ।

नेता जमरकट्टेलले सामाजिक सञ्जालमार्फत प्रचण्डलाई कमजोर पारेर पार्टी एकता जोगाउन नसकिने पनि बताएका छन् । ‘आन्दोलनमा बिचार, नेतृत्व र संगठको महत्वलाई ठिक ढंगले बुझ्नुपर्दछ’, सामाजिक सञ्जालमार्फत उनले प्रश्न गरेका छन्, ‘नेपाल कम्युनिष्ट पार्टी (नेकपा)भित्रका पूर्वमाओवादी पक्ष किन एक ढिक्का हुन सकेन ? अध्यक्ष कमरेड प्रचण्डलाई किन कमजोर बनाउन खोजीदैछ ? स्थायी समिति र केन्द्रीय समिति का नेताहरू किन चुप लागेर बसेका छन ? अध्यक्ष कमरेड प्रचण्डलाई कमजोर पारेर पार्टी एकता जोगिन्छ त ?’

बालुवाटारमा गोप्य भेट गर्ने पूर्वमाओवादी नेताहरुप्रति नेता जमरकट्टेलले प्रधानमन्त्रीसमेत रहेका पार्टी अध्यक्ष केपी शर्मा ओलीको सहयोग खोजेर पार्टी एकता नजोगिने पनि टिप्पणी गरेका छन् । उनले प्रचण्डको नै कुरा नसुन्नेले अरुको कुरा नपत्याउने पनि बताएका छन् । ‘कतिपय स्थायि समितिका सदस्य कमरेडहरूको भावना राम्रै होला तर अध्यक्ष कमरेडको त्यत्रो त्यागलाई अपमान गर्ने, उहाँको कुरा नसुन्नेले तपाईंहरूको कुरा पत्याएर एकता जोगाईदिनु हुन्छ’, उनले भनेका छन् ।

नेता जमरकट्टेलले पार्टी एकता जोगाउनको निम्ति पनि पूर्वमाओवादीहरु एक ढिक्का हुनुपर्ने बताएका छन् । कमीकमजोरीको समिक्षा गरौंला भन्दै उनले अध्यक्ष प्रचण्डको वरिपरि एकताबद्ध हुन र सक्रिय हुन आह्वान गरेका छन् ।

नेपाल कम्युनिष्ट पार्टी (नेकपा)भित्रका पूर्वमाओवादी पक्ष किन एक ढिक्का हुन सकेन ? अध्यक्ष कमरेड प्रचण्डलाई किन कमजोर बनाउन खोजीदैछ ? स्थायी समिति र केन्द्रीय समिति का नेताहरू किन चुप लागेर बसेका छन ? अध्यक्ष कमरेड प्रचण्डलाई कमजोर पारेर पार्टी एकता जोगिन्छ त ?

उनले भनेका छन्, ‘मेरो बिचारमा पार्टी एकता जोगाउन अध्यक्ष वरिपरि नै पुर्ब माओबादी धार केन्द्रित हुनु पर्दछ । कमिकमजोरीको समिक्षा गर्दे जाउला पुर्ब माओवादी पक्ष अध्यक्ष कमरेड प्रचण्डको वरिपरि एकताबद्व बनौ । उहाँले अगाडी बढाउने सबै कदमहरूलाई साथ दियौ। संकटको बेलामा मौन भएर कोही पनि नबसौ । यतिखेरको हाम्रो मतले बिशेष अर्थ राख्नेछ । तब मात्रै पार्टी एकता जोगिने छ ।’

नेकपाभित्र आन्तरिक विवाद चुलिँदै जाँदा पूर्वमाओवादी खेमाकै केहि मन्त्रिसहित स्थायी समिति सदस्यहरु प्रधानमन्त्रीसमेत रहेका अध्यक्ष ओली निकट देखिएका छन् । उनीहरुले प्रचण्डको एजेण्डालाई गलत भएको भन्दै खुलेरै ओलीको समर्थन गरेका छन् ।

ओलीले एकल रुपमा स्थगित गराएको अनि प्रचण्डले सञ्चालन गरेको गत मंगलबारको स्थायी समिति बैठकमा पनि पूर्वमाओवादीका ४ स्थायी समिति सदस्यहरु उपस्थित थिएनन् । बैठकमा अनुपस्थित नेताहरुले बुधबार साँझ गोप्य रुपमा ओलीलाई भेटेर आफ्ना कुराहरु राखेका थिए । जससँगै पूर्वमाओवादी खेमामा ठुलो तरंग सिर्जना भएको थियो भने प्रचण्डलाई ओलीसँग मिल्न दबाब सिर्जना भएको थियो ।

यस्ताे छ जम्कट्टेलकाे फेसबुक स्टाटस