काठमाडौं । माध्यमिक शिक्षा परीक्षा (एसइइ)को नतिजा प्रकाशनको तयारी अन्तिम चरणमा पुगेको परीक्षा नियन्त्रण कार्यालयले जानकारी दिएको छ । परीक्षा नियन्त्रक रामराज खकुरेलले जानकारी दिएअनुसार नतिजा अबको केही दिनभित्रै सार्वजनिक हुनेछ ।
‘एसइइको नतिजाको लागि परीक्षा नियन्त्रण कार्यालयको तर्फबाट हुने सबै तयारी सकिएको छ, परीक्षा बोर्डको बैठक बसेसँगै लगत्तै नतिजा सार्वजनिक हुन्छ’, खकुरेलले भने, ‘हाम्रो तयारी छिटोभन्दा छिटो सार्वजनिक गर्नेमा छ ।’
खकुरेलका अनुसार परीक्षा नियन्त्रण कार्यालयले सबै विद्यालयले पठाएको विवरण रुजू गर्ने र प्राप्ताङ्ग कम्यूटरमा राख्ने काम गरिसकेको छ । परीक्षा नियन्त्रण कार्यालयले तयार गरेको विवरण परीक्षा बोर्डबाट स्वीकृत भएसँगै नतिजा सार्वजनिक हुनेछ ।
नियन्त्रक खकुरेलका अनुसार परीक्षा बोर्डको बैठक बसेको एक/दुई दिनभित्रमै नतिजा सार्वजनिक हुनेछ । उनले जनाएअनुसार अबको ३÷४ दिनभित्र नतिजा सार्वजनिक हुने सम्भावना छ ।
लकडाउन र बाढी पहिरोको कारण विद्यालयले मूल्यांकन विवरण पठाउन ढिलाई गर्दा नतिजा तयारीमा केही ढिलाई हुन पुगेको थियो । परीक्षा नियन्त्रण कार्यालयले असार ३० सम्म सबै विद्यालयलाई विवरण पठाउन निर्देशन गरेपनि विवरण भने एक साता पछि मात्रै प्राप्त भएको थियो ।
कोरोना महामारीका कारण लकडाउन भएसँगै स्थगित गत वर्षको एसइइ परीक्षा सम्बन्धित विद्यालयको आन्तरिक मूल्यांकनको आधारमा तयार गर्ने गरि कार्यविधि बनेको थियथो । सोही कार्यविधि अनुसार नै परीक्षा नियन्त्रण कार्यालयले अन्तिम नतिजा तयार गरेको हो । परीक्षा नियन्त्रण कार्यालयले जनाएअनुसार विद्यालयले पठाएको अंकभारलाई नै अन्तिम मानेर नतिजा तयार भएको छ ।
गत जेठ २८ मा बसेको मन्त्रिपरिषद बैठकले गत वर्षको एसइइ परीक्षाको नतिजा विद्यालयकै मूल्यांकनको आधारमा गर्ने निर्णय गरेको थियो ।
सम्बन्धित समाचार
वि.सं.२०७७ साउन १९ सोमवार १४:४३ मा प्रकाशित