Sansar News
काठमाडौं । सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीचको यसअघि तय भएको भेटवार्ता स्थगित भएको छ । साँझ ५ बजेबाट हुने भनिएको भेटवार्ता अन्तिम समयमा स्थगित भएको हो ।
प्रधानमन्त्रीका प्रेस सल्लाहकार सुर्य थापाले जानकारी दिएअनुसार अध्यक्षद्वयबीच बिहिबार (भोली) बिहान छलफल हुनेछ । उनले भेटवार्ता स्थगनको कारण भने खुलाएका छैनन् ।
आन्तरिक विवादको समाधानका लागि अध्यक्षद्वयबीच केहि दिनदेखि नियमित भेटवार्ता हुँदै आएको थियो । अध्यक्षद्वयबीचको भेटवार्तामा पार्टी वरिष्ठ नेता झलनाथ खनाल र संसदीय दलका उपनेता सुवासचन्द्र नेमाङ्गले सहजीकरण गर्दै आएका थिए ।
नियमित भईरहेको भेटवार्ता अन्तिम समयमा स्थगन भएसँगै आन्तरिक विवादबारे केहि शंका जन्मिएका छन् । यसअघि मंगलबारको बैठकमा अध्यक्षद्वयबीच चर्काचर्की चलेको चर्चा बाहिरिएको थियो ।
वि.सं.२०७७ साउन २१ बुधवार १७:२१ मा प्रकाशित
