हामी सबैकाे संसारन्यूज

२३ साउन, काठमाडौँ । युट्युबरहरुलाई जथाभावि प्रसारण नर्गन आग्रह गरिएको छ ।

अनलाइन टिभी पत्रकार संघले अपिल जारी गदैै युट्युबलगायतका अनलाइन टिभी सञ्चारकर्मीलाई पत्रकार आचारसंहिता २०७३ को मर्मअनुसार काम गर्न आह्वान गरेको हो ।

बालगृह सञ्चालिका पुष्पा अधिकारीसँग केही अनलाइन टिभी सञ्चारकर्मीले गरेको व्यवहारलाई लिएर सर्वत्र चासो व्यक्त भइरहेको प्रति गम्भिर ध्यानाकर्षण भएको भन्दै संघले त्यस्तो व्यवहार नगर्न र पत्रकार आचारसंहिताको ख्याल गर्न आग्रह गरेको हो ।

संघले युट्युबरलगायतका अनलाइन टिभी पत्रकारलाई सामाजिक दायित्व नभुलेर आफूलाई सुधार्दै लैजान आग्रह पनि गरेको छ ।

संघका महासचिव राजु सुवेदीद्वारा जारी वक्तव्यमा तत्काललाई पत्रकार आचारसंहिता २०७३ नै पालना गर्न र चाँडै नै अनलाइन टिभी पत्रकार आचारसंहिता जारी गर्न लागिएको उल्लेख गरिएको छ ।
संघले विगतमा भएका कमिकमजोरीलाई सुधार्दै अघि बढ्नु पर्ने आवश्यकता भएकाले सबै अनलाइन टिभी पत्रकारलाई सङ्घमा आबद्ध भएर यस क्षेत्रको शुद्धीकरण र सुदृढीकरणमा लाग्न विज्ञप्तीमा आग्रह गरिएको छ ।