Sansar News
काठमाडौं । सोमबारदेखि सम्पर्कविहीन बनेका पत्रकार बलराम बानियाँको शव फेला परेको छ । प्रहरीको महानगरीय अपराध महाशाखाले जनाएअनुसार बानियाँको शव मकवानपुरस्थित बागमती नदीमा फेला परेको हो ।
काठमाडौं प्रहरी प्रमुख श्याम ज्ञवालीका अनुसार मकवानपुरमा भेटिएको उनको शव परिवारले सनाखत गरेका छन् । अहिले उनको शव पोष्टमार्टमको लागि जिल्ला अस्पताल हेटौंडा लगिएको उनले जनाए ।
बानियाँ सोमबार दिउँसोदेखि सम्पर्क बिहिन भएका थिए । सम्र्पक विहिन भएसँगै उनको परिवारले खोजीको लागि प्रहरीमा निवेदन दिएका थिए ।
लामो समयदेखि कान्तिपुर दैनिकसँग आवद्ध भएका बानियाँ तनहुँका स्थायी बासिन्दा हुन् । उनले गत असार १० मा ‘चीनले नेपालको भूभाग ओगटेको’ भन्ने समाचार लेखेका थिए । जुन समाचारका कारण कान्तिपुरले सार्वजनिक क्षमायाचना पनि जनाएको थियो ।
वि.सं.२०७७ साउन २८ बुधवार १४:३४ मा प्रकाशित
