Sansar News
काठमाडौं । सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीचको वार्ता सकिएको छ । प्रधानमन्त्री निवास बालुवाटारमा झण्डै ३ घण्टासम्म चलेको वार्ता सकिएको हो ।
आजको वार्ता विवाद समाधान उन्मुख रहेको र सकारात्मक भएको प्रचण्डका प्रेस संयोजक विष्णु सापकोटा ‘जुगल’ले जानकारी दिएका छन् । संसार न्यूजसँग कुराकानी गर्दै जुगलले भने, ‘पार्टीभित्र देखिएका समस्याको समाधान उन्मुख कोणबाट छलफलको सुरुवात भएको छ । आजको छलफल निकै सकारात्मक रह्यो ।’
उनले जनाएअनुसार दुई अध्यक्षबीच भोली पुनः छलफल हुनेछ ।
यसअघि बुधबार एक टेलिभिजनसँगको अन्तरवार्ताको क्रममा प्रधानमन्त्रीसमेत रहेका पार्टी अध्यक्ष ओलीले पाँच दिनभित्रै नेकपाको संकट समाधान हुने बताएका थिए । जसको भोलीपल्टै दुई अध्यक्षबीच वार्ता भएको हो ।
गत साउन २१ मा अध्यक्ष प्रचण्डसहित वरिष्ठ नेता झलनाथ खनाल, माधव नेपाल र प्रवक्ता नारायणकाजी श्रेष्ठले बेग्लै पत्रकारको भेला गरेसँगै दुई अध्यक्षबीचको संवाद रोकिएको थियो । त्यसयताका समयमा ओलीले छलफलका लागि रुची नदेखाएको चर्चा भएको थियो ।
स्थायी समिति बैठकका बीच प्रधानमन्त्रीसमेत रहेका पार्टी अध्यक्ष ओलीको राजीनामा मागिएसँगै नकेपाभित्र विवाद चुलिएको थियो । नेकपाभित्र बहुमत पक्षधर ओलीले राजीनामा दिनुपर्ने अडानमा छन् भने ओली कुनै हालतमा कुनै पदबाट राजीनामा नदिने अडानमा छन् ।
सम्बन्धीत समाचार
वि.सं.२०७७ साउन २९ बिहीवार १५:३६ मा प्रकाशित
