Sansar News
३२ साउन, काठमाडौं । विश्वव्यापी रुपमा फैलिएको कोभिड–१९ को महामारीबाट विश्वका सबैजसो देश आक्रान्त भएको बेला ती देशमा काम गर्ने नेपाली पनि यसको मारमा परेका छन् ।
कोरोनाका कारण रोजगारी गुमाइरहेका र गुम्ने अवस्था आएका तथा विभिन्न कामका लागि विदेश गएर उतै पसेका नेपालीहरु स्वदेश फर्कने क्रम जारी छ ।
महामारीका कारण विदेशमा अलपत्र परेका नागरिकलाई स्वदेश फर्काउने काम सुस्त गतिमा भइरहेको भन्ने नागरिकको गुनासो चलिरहेका बेला पनि झण्डै ५० हजार भन्दा बढी नेपाली स्वदेश फर्किइसकेका छन् ।
नेपाल सरकारको तथ्यांक अनुसार शुक्रबारसम्म विश्वका ३० देशमा रहेका ५१ हजार चारसय ४१ नेपाली नेपाल फर्कन सफल भएका छन् ।
त्यसैगरी स्वदेश फर्कनेमा सबैभन्दा बढी युएईमा रहेका नेपाली रहेका छन् ।
यूएईबाट हालसम्म १४,३१४ नेपाली फर्किसकेका छन् । दोस्रोमा साउदी अरेबियाबाट ७,८१७ नेपाली देश फर्किएका छन् ।
त्यस्तै मलेसियाबाट ७,६४२, कुवेतबाट ६,३२९, कतारबाट ६,१९१, जापानबाट १,२८२, बहराइनबाट ९८०, दक्षिण कोरियाबाट ९६७, अस्ट्रेलियाबाट ९४३, बंगलादेशबाट ८४१, ओमानबाट ८११ र माल्दिभ्सबाट ७०९ नेपाली स्वदेश फर्किएका हुन् ।
त्यस्तै अमेरिकाबाट ४२३, थाइल्यान्डबाट ३२६, सिंगापुरबाट २९७, दक्षिण सुडानबाट २५०, बेलायतबाट २२९, चीनबाट २०८, फिलिपिन्सबाट २०१, इजरायलबाट १२७, टर्कीबाट ११०, हङकङबाट ९, भारतबाट ८५ पाकिस्तानबाट ७२, सेन्ट्रल अफ्रिकन रिपब्लिकबाट ६, अफगानिस्तानबाट ५०, इराकबाट ३९, म्यानमारबाट २६, स्विजरल्यान्डबाट १० जना र श्रीलंकामा रहेका ५ नेपाली स्वदेश फर्किएका हुन् ।
कोरोनाको सुरुवाती चरणमा विदेश बस्ने नेपालीहरु धेरैले देश फर्किन चासो देखाएपनि विभिन्न कारणले देश फर्किनेको यो संख्या कम रहेको बैदेशिक रोजगार विज्ञ बताउँछन्
वि.सं.२०७७ साउन ३२ आइतवार ०९:५२ मा प्रकाशित
