हामी सबैकाे संसारन्यूज

लमजुङ । जिल्ला प्रहरी कार्यालय लमजुङले ठूलो मात्रामा अवैध जंगली जडिबुटीसहित एक महिला पक्राउ गरेको छ । प्रहरीले आइतबार अवैध जडुबुटीसहित लमजुङ बेसिशहर नगरपालिका वडा नं. ७ बस्ने सिद्धि माया तामाङलाई पक्राउ गरेको हो ।

प्रहरीले जनाएअनुसार तामाङले लुकाई छिपाई आफ्नै घरमा ठुलो मात्रामा जडिबुटि संकलन गरेकी थिइन् । जसको बारेमा सूचना पाएसँगै प्रहरीले उनलाई पक्राउ गरेको हो ।

प्रहरीले जनाएअनुसार तामाङको घरबाट डालिङ (गुरुङ भाषामा टलिट) ४७६.१ के.जी, वन लसुन १५४ के.जी, कुड्की २४.६ के.जी, जटामसी १४.९ के.जी, सुगन्धवाल १८.३ के.जी, सतुवा ४.४ के.जी, वन आलु २.८ के.जी बरामद गरेको छ । प्रहरीले जनाएअनुसार सबै जडुबुटीको तौल करिब ७ सय केजी छ ।

प्रहरीले जडिबुटीको बारेमा थप कारबाहीका लागि डिभिजन वन कार्यालय लमजुङ पठाएको छ । प्रहरीले जनाएअनुसार घटनाका विषयमा थप अनुसन्धान भईरहेको छ ।