हामी सबैकाे संसारन्यूज

१४ भदौ, काठमाडौँ । सरकारले अब सबैको नागरिकको कोरोनाभाइरसको निःशुल्क परीक्षण नगर्ने भएको छ । स्वास्थ्य मन्त्रालयले मापदण्ड बनाएर तीन थरीलाई मात्र निःशुल्क परीक्षण गर्ने अरुको भने आफैले गर्नुपर्ने निर्णय गरेको छ।

मन्त्रालयका सहप्रवक्ता डा समिरकुमार अधिकारीका अनुसार सङ्क्रमितको निकट सम्पर्कमा आएका, लक्षण देखिएका र अग्रभागमा काम गर्ने व्यक्तिहरूको मात्र निःशुल्क परीक्षण गरिने छ ।

शंकाको भरमा अनावश्यक व्यक्तिहरु परीक्षण गर्ने क्रम बढी देखिएपछि सरकारले परीक्षणको व्यवस्थामा पुनरावलोकन गरेको पनि प्रवक्ता अधिकारीले बताए ।

आफैले पैसा तिरेर गर्दा पनि पहिलो भन्दा केही कम मूल्यमै परीक्षण गर्न पाइने भएको छ । स्वास्थ्य मन्त्रालयले आजै देखि लागू हुने गरी कोरोना भाइरस परीक्षणमा तिनुपर्ने शुल्क१ हजार १ सय रुपैयाँले घटाएको हो । नयाँ शुल्क बढीमा ४ हजार ४ सय रुपैयाँ तोकेको छ । यसअघि कोरोना परीक्षण शुल्क ५ हजार ५ सय रुपैयाँ थियो ।

सहप्रवक्ता डा अधिकारीले परीक्षणका लागि आवश्यक सरसामानको मूल्य घटेसँगै परीक्षण शुल्कमा समायोजन गरिएको बताए । साथै परीक्षणको व्यवस्था परिमार्जन गरिएसँगै शुल्क पनि घटाइएको उनले बताए ।

मन्त्रालयले ९ वटा सरकारी र ११ वटा निजी प्रयोगशालामा शुल्क लिएर परीक्षण गर्ने अनुमति दिएको छ ।