हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को स्थायी समिति बैठक जारी छ । बैठकमा अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले पेस गरेको प्रतिवेदनमाथि केन्द्रित रहेर छलफल भईरहेको छ ।

५१ दिनको स्थगनपछि सुरु बैठकमा केहि परिवर्तनहरु देखिएका छन् । आजको बैठकमा पार्टीका कार्यकारी अध्यक्ष प्रचण्डको कुर्सी स्थान फेरिएको छ । प्रधानमन्त्री ओलीका प्रेस सल्लाहकार सुर्य थापाले सार्वजनिक गरेको तस्बिरमा प्रचण्डको कुर्सी सबैको ‘सेन्टर’मा देखिन्छ ।

बैठकमा स्थलमा प्रचण्डको दाँयातिर ओली र वरिष्ठ नेता झलनाथ खनाल छन् भने बायाँतर्फ वरिष्ठ नेता माधवकुमार नेपाल र पार्टी उपाध्यक्ष बामदेव गौतम छन् । बैठक स्थललाई हेर्दा महासचिव पौडेलसहित अन्य सचिवालयका सदस्यलाई बेग्ला–बेग्लै कुर्सी र टेबलको व्यवस्था गरिएको छ ।

अन्य स्थायी समिति सदस्यलाई दुई/दुई जनाको दरले राखिएको देखिन्छ ।

यसअघि नेकपाभित्र पटक–पटक दुई अध्यक्षको कुर्सीलाई लिएर विवाद चल्दै आएको थियो । प्रचण्डले कुर्सी र उचित भूमिका नपाएको दुःखेसो पोख्दै आएका थिए । विगतका बैठकहरुमा प्रधानमन्त्री ओलीको कुर्सी ‘सेन्टर’मा रहने गर्दथ्यो ।