Sansar News
काठमाडौं । विद्युत प्राधिकरणको कार्यकारी निर्देशकमा कुलमान घिसिङ्गलाई नै निरन्तरता दिने बताइरहेका उर्जा, जलस्रोत तथा सिंचाई मन्त्री वर्षमान पुनले मन्त्रिपरिषद बैठकमा भने प्रस्ताव नलगेको बुझिएको छ । मन्त्रि पुनको सचिवालयले बैठकमा प्रस्ताव नलगेको जानकारी दिएको हो ।
आजको मन्त्रिपरिषद बैठकबाट घिसिङ्गलाई नियुक्ती गरिने बताइरहेको बेला प्रस्ताव नगएसँगै नियुक्तीको विषय अन्यौंलमा परेको छ । मन्त्री पुन आफैंले कुलमानलाई नै निरन्तरता दिने गरि छलफल चलिरहेको बताएका थिए ।
उनको सचिवालयले पनि कुलमानको पक्षमा प्रस्ताव तयार गरिसकेको बताएको थियो । पुनले गत बुधबार रोल्पाको लिवाङमा पत्रकार भेटघाट कार्यक्रममा कुलमानको नियुक्तीबारे मुख खोलेका थिए ।
कुलमानको कार्यकाल भदौ २९ देखि सकिएको छ । उनले आफ्नो कार्यकालमा लोडसेडिङ्गको समस्यालाई हटाएर घाटामा गएको प्राधिकरणलाई नाफामा ल्याएका छन् ।
सम्बन्धित समाचार
विद्युत प्राधिकरणमा कुलमानको पुनः नियुक्ती निश्चित, ओलीको निर्देशनमा तयार भयो प्रस्ताव
वि.सं.२०७७ भदौ २९ सोमवार १८:२५ मा प्रकाशित
