Sansar News
काठमाडाैं । सानिमा जनरल इन्स्योरेन्स कम्पनीले सर्वसाधारणको लागि प्राथमिक शेयर (आईपीओ) निष्काशनको अनुमति प्राप्त गरेको छ। नेपाल धितोपत्र बोर्डबाट कम्पनीले साेमबार प्राथमिक शेयर निष्काशन गर्ने अनुमति पाएकाे हाे ।
कम्पनीले हाल कायम जारी पूँजीको ३० प्रतिशत अर्थात ३० करोड रुपैयाँ बराबरको ३० लाख कित्ता आईपीओ निष्काशन गर्न अनुमति पाएको हो । आईपीओ निष्काशन पछि कम्पनीको चुक्ता पुँजी एक अर्ब रुपैयाँ पुग्नेछ।
कम्पनीको आईपीओ एनआईसी एशिया क्यापिटललाई निष्काशन गर्नेछ । सानिमा जनरल इन्स्योरेन्सले आईपीओ निष्काशन गर्ने प्रस्ताव गत माघ २४ गते सम्पन्न साधारण सभाले पारित गरेको थियो ।
कम्पनी निष्काशनले गर्न लागेको उक्त आईपीओलाई केयर रेटिङ्ग नेपालले ‘केयर एनपी वीवी प्लस’ रेटिङ्ग प्रदान गरेको छ । उक्त रेटिङ्गले कम्पनीको वित्तीय अवस्था मध्यम रहेको जनाउँछ।
कम्पनीले दुई वर्षअघि बीमा समितिबाट निर्जीवन बीमा व्यवसाय सञ्चालन गर्ने अनुमति पाएको थियो। बीमा समितिले तीनवटा नयाँ कम्पनीलाई निर्जीवन बीमा व्यवसाय सञ्चालन गर्ने अनुमति प्रदान गरेको थियो।
वि.सं.२०७७ असोज ५ सोमवार १७:३९ मा प्रकाशित
