हामी सबैकाे संसारन्यूज

काठमाडौं । एसिड आक्रमण गर्नेलाई कडा कारबाही गर्ने गरि अध्यादेश पारित भएको छ । बिहिबार बसेको मन्त्रिपरिषद बैठकले फौजदारी कसुर तथा फौजदारी कार्यविधिसम्बन्धी केही ऐन संशोधन गर्न बनेको अध्यादेश पारित गरेको हो ।

कानुन, न्याय तथा संसदीय मन्त्रालका अनुसार पारित अध्यादेशमा एसिड छ्यापेर कसैको मृत्यु भएमा जन्मकैद र घाइते, अंगभंग वा शरीरका कुनै अंगमा क्षति पुऱ्याए २० वर्ष कैद र १० लाख क्षतिपूर्ति भराउने व्यवस्था छ ।

हालसम्म भएका कानूनी प्रावधानमा एसिड आक्रमणमा कसैको मृत्यु भएमा जन्मकैद र घाईते वा अंगभंग भएमा अधिकतम ८ वर्षसम्म कैद सजायँ हुने व्यवस्था छ । त्यस्तै एसिड आक्रमणसम्बन्धी कसुरमा अभियुक्तविरुद्व ज्यान मार्ने उद्योगअन्तर्गत कारबाही हुने व्यस्था छ । जहाँ अधिकतम १० वर्षसम्म कैद सजायँ हुने व्यवस्था छ । भएका कानूनी प्रावधान कमजोर भएको भन्दै सरकारले अध्यादेशमार्फत एसिडसम्बन्धी छुट्टै कानून बनाउन लागेको हो ।

मन्त्रिपरिषदले पारित गरेको अध्यादेशमा जरिबानावापत् सरकारले अशुल गरेको सम्पूर्ण रकम पीडितलाई नै क्षतिपूर्ति भराउने उल्लेख छ ।
प्रधानमन्त्री केपी शर्मा ओलीले एसिड आक्रमणबाट पीडित बनेका व्यक्तिहरूसँग छलफल गरेपछि अध्यादेश ल्याएका हुन् । उनले एसिड आक्रमणका पीडितसँग कडा कानूनी व्यवस्था ल्याउने आश्वासन दिएका थिए ।

पछिल्लो समय नेपालमा एसिड आक्रमणका घटना बढ्दै गएका छन् । कमजोर कानूनी व्यवस्थाका कारण आक्रमणकारीहरु माथि गतिलो कारबाही नहुँदा घटना बढेको धेरैको बुझाई छ ।