Sansar News
२७ कार्तिक, काठमाडौं । प्रभु बैंकले मोबाइलमा भएको एपबाट स्क्यान गरी नगद झिक्न मिल्ने सुविधा ल्याएको छ । बैंकले बैंकिङ प्रणालीलाई समयसापेक्ष रुपमा डिजिटल बनाउदै लैजाने प्रयास स्वरुप यो प्रणालीको सुरुवात गरेको हो ।
बैंकका अनुसार बैंकका ग्राहाकहरुले आएर स्क्यान गरेर आफ्नो खातामा भएको नगद निकाल्न सक्छन् । यो सुविधा जुनसुकै बैंकका ग्राहकले पनि प्रभु बैंकमा गएर मोबाइलमा भएको एपमार्फत् स्क्यान गरी नगद झिक्न सक्ने बैंकले जानकारी दिएको छ ।
हाल नेपालमा मोबाइल बैंकिङ प्रयोग गर्नेहरुको संख्या १ करोडभन्दा बढी रहेका छन् । प्रभु बैंकको मात्र मोबाइल बैंकिङ प्रयोगकर्ता ५ लाखभन्दा बढी रहेको र आगामि दिनमा यसको संख्या बढ्दै जाने भएकोले बैंकले यो प्रणालीको सुरुवात गरेको हो ।
बैंकका अनुसार जुनसुकै बैंकका ग्राहकले पनि प्रभु बैंकको कुनै पनि शाखामा गएर नगद झिक्न सक्नेछन । अन्य बैंकको हकमाभने नगद झिक्दा निश्चित सेवा शुल्कलाग्ने छ ।
क्यूआर कोड स्क्यान गरी ग्राहाकले नेपाल राष्ट्र बैंकले मोबाइल बैंकिङका लागि तोकेको सीमाभित्र रहेर मात्रै रकम निकाल्न पाइनेछ । क्यूआर कोड स्क्यान गर्दा सेवाग्राहिहरुले झिक्नु पर्ने रकम टाइप गर्नुपर्ने छ र टेलरमा आफ्नो आधिकारिक परिचय पत्र बुझाएर फारम भर्नुपर्ने हुन्छ । त्यसपछि टेलरले झिक्न चाहेको रकम यकिन गरी नगद भुक्तानी गर्दछ ।
वि.सं.२०७७ कात्तिक २७ बिहीवार १५:४५ मा प्रकाशित
