हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)भित्र विवाद चर्किरहेको बेला पार्टी अध्यक्षसमेत रहेका प्रधानमन्त्री केपी शर्मा ओलीले सत्ता साझेदारीको लागि प्रमुख प्रतिपक्षी नेपाली कांग्रेससँग प्रस्ताव राखेका छन् । उनले कांग्रेस सभापति शेरबहादुर देउवालाई बोलाएर यस्तो प्रस्ताव राखेका हुन् ।

कांग्रेस उच्च स्रोतका अनुसार शनिबार भएको भेटमा ओलीले सभापति देउवालाई महत्वपूर्णं केहि मन्त्रालयसहित सहकार्यको प्रस्ताव राखेका हुन् । संवैधानिक नियुक्तीका विषयमा छलफल गर्न भन्दै ओलीले देउवालाई शनिबार बालुवाटार बोलाएका थिए ।

करिब डेढ घण्टासम्म चलेको छलफलमा उनले आफुँ समस्यामा परेको भन्दै सहयोगको आग्रहसहित सत्ता साझेदारीको प्रस्ताव गरेका थिए । ‘उहाँ समस्यामा हुनुहुन्छ, बेला–बेला यी विषयमा छलफल हुन्छन्, शनिबार पनि धेरै कुरा भएका छन्’, कांग्रेसका एक नेताले भने, ‘उहाँले आफुँलाई सहयोग गर्न प्रस्ताव गर्नुभएको छ ।’

उनका अनुसार प्रधानमन्त्री ओलीले केहि महत्वपूर्णं मन्त्रालयको प्रस्ताव अघि सारेका छन् ।

स्रोतले जनाएअनुसार शनिबारको छलफलमा ओलीले उपप्रधानमन्त्री ईश्वर पोखरेल, नेकपा संसदीय दलका उपनेता सुवास नेम्वाङ, परराष्ट्रमन्त्री प्रदीप ज्ञवाली, स्वास्थ्यमन्त्री भानुभक्त ढकाललगायतलाई साथै राखेका थिए भने देउवाले गोपालमान श्रेष्ठ र रमेश लेखकलाई साथै राखेका थिए ।